Një ngjarje e rëndë është shënuar të mërkurën në fshatin Likoc të Skenderajt, ku një person është gjetur pa shenja jete në shtëpinë e tij.
Sipas njoftimit të Policisë së Kosovës, rasti ka ndodhur në një kohë të pacaktuar gjatë ditës, ndërsa trupi i pajetë është zbuluar nga familjarët.
“Është raportuar se viktima, mashkull kosovar, në shtëpinë e tij është gjetur pa shenja jete. Në vendin e ngjarjes kanë dalë njësitë policore dhe ekipi i mjekëve, të cilët kanë konstatuar vdekjen e tij,” thuhet në njoftimin e policisë.
Autoritetet kanë bërë të ditur se, me urdhër të prokurorit të rastit dhe kërkesën e familjarëve, trupi i pajetë është dërguar në Institutin e Mjekësisë Ligjore (IML) për obduksion, në mënyrë që të përcaktohen rrethanat dhe shkaku i saktë i vdekjes.
Hetimet lidhur me rastin janë në vazhdim.
