Gjashtë personat të cilët kishin pësuar lëndime të rënda trupore, si pasojë e defektit të ashensorit, tashmë pas ndihmës mjekësore emergjente pesë prej tyre janë liruar në shtëpi, kurse një është pranuar për trajtim të mëtejmë në Klinikën e Ortopedisë, i cili është jashtë rrezikut për jetë.
Kështu ka bërë të ditur Zyra për Informim nga Qendra Klinike Universitare e Prishtinës, raporton teve1.info
“Mbrëmë, rreth orës 23:30, në Klinikën Emergjente të QKUK-së, janë pranuar 6 persona të lënduar nga rënia e liftit. Pas ndihmës mjekësore emergjente, 5 persona janë liruar në shtëpi, kurse 1 është pranuar për trajtim të mëtejmë në Klinikën e Ortopedisë, jashtë rreziku për jetë”, thuhet në njoftim.
Ndërkohë, Policia e Kosovës në raportin 24 orësh ka bërë të ditur se ashensori ka rënë nga kati i dytë në podrumin e një ndërtese, në Prishtinë.
Sipas Policisë, rasti është ende duke u hetuar.
