Gjykata Themelore në Ferizaj – Departamenti për të Mitur, u ka caktuar nga një muaj paraburgim tre të dyshuarve për zjarrvënien në objektin e Gjykatës Themelore në Ferizaj – Dega në Kaçanik, më 13 mars.
Sipas aktakuzës tre të miturit përmes shkallëve emergjente kanë depërtuar në katin e dytë dhe me shishe kanë hedhur benzinë në dy zyre të gjyqtarëve penalistë dhe në korridor.
“Pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për të Mitur, ka vlerësuar se ekziston dyshimi i bazuar, se të miturit me datë 13 mars 2024, rreth orës 03:42, me qëllim të dëmtimit me dashje kanë ndezë zjarrin në objektin e Gjykatës Themelore në Ferizaj – Dega në Kaçanik, ashtu që pas planifikimit paraprak, përmes shkallëve emergjente depërtojnë në katin e dytë ku me shishe hedhin benzinë në dy zyre të gjyqtarëve penalist dhe në korridor, pastaj nga shkallët emergjente ndezin zjarrin, ku për pasojë shpërthen zjarri dhe dy zyrat e gjyqtarëve dëmtohen tërësisht e po ashtu edhe korridori, kurse të dyshuarit tjerë bëjnë roje përreth gjykatës”, shkruan në njoftim.
Në orët e hershme të së mërkurës, tre persona dyshohet se i kanë vënë zjarrin Gjykatës Themelore të Ferizajt, degës në Kaçanik. Nga ky zjarr është dëmtuar kati i dytë i këtij objekti.
Nga ky zjarr janë dëmtuar materialet, mirëpo zyrtarët e kësaj gjykata thonë se të njëjtat i kanë edhe në databaza edhe online.
Tre persona të dyshuar për djegien e Gjykatës Themelore në Kaçanik
