Gjykata Themelore në Ferizaj ka miratuar kërkesën e Prokurorisë Themelore për caktimin e masës së paraburgimit ndaj të pandehurit B.R., për shkak të dyshimit të bazuar se ka kryer veprën penale “vrasje e rëndë”.
Sipas njoftimit zyrtar, pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake, Habib Zeqiri, nga Departamenti për Krime të Rënda, ka vlerësuar se ekziston dyshimi i bazuar se më 15 shtator, rreth orës 19:42, në një fshat të komunës së Ferizajt, i pandehuri me dashje e ka privuar nga jeta viktimën I.R., i cili dyshohet të jetë djali i axhës së tij.
“Në atë mënyrë që, pas një mosmarrëveshje të mëhershme si pasojë e problemeve në lidhje me një konflikt pronësor, me t’u takuar në rrugën e fshatit, pas një fjalosjeje verbale, i pandehuri B.R. e ka nxjerrë revolen e tipit ZIG 14 TISAS (turk) dhe ka shtënë katër herë në drejtim të viktimës I.R., duke e goditur në pjesët e sipërme të trupit – në anën e djathtë, nofullë, kraharorin e djathtë (dy plagë) dhe në të dy parakrahët, me ç’rast viktima ka ndërruar jetë rrugës për në Qendrën Emergjente në Ferizaj,” thuhet në komunikatën e gjykatës.
Bazuar në vlerësimin e gjyqtarit, janë përmbushur kushtet ligjore për caktimin e masës së paraburgimit, e cila është aprovuar si e bazuar konform dispozitave të Kodit të Procedurës Penale të Republikës së Kosovës. Të pandehurit B.R. i është caktuar masa e paraburgimit në kohëzgjatje prej një muaji.
Gjykata ka sqaruar se ankesa ndaj këtij vendimi nuk e shtyn ekzekutimin e tij.
