Gjykata Themelore në Prizren i ka caktuar një muaj paraburgim, deri më 3 shtator, të pandehurit me inicialet E.R., i cili dyshohet se, së bashku me katër persona të tjerë, e mbajti të mbyllur në mënyrë të kundërligjshme një të dëmtuar, si dhe ushtroi presion e kërcënime ndaj tij për të penguar procedurën penale.
Ai dyshohet për dy vepra penale të detyrimit në bashkëkryerje, privim të kundërligjshëm të lirisë dhe frikësim gjatë procedurës penale në vazhdimësi.
Sipas dyshimeve të ngritura paraprakisht nga prokuroria, E.R. gjatë vitit 2025, në bashkëkryerje me persona të tjerë, si pjesë e një grupi të organizuar, ka përdorur kanosjen për ta detyruar të dëmtuarin të kryejë veprime në dëm të pasurisë së tij, duke i shkaktuar dëm material, si dhe frikë, ankth e pasiguri për jetën e tij dhe të familjarëve.
Po ashtu, gjatë vitit 2025, i pandehuri, gjithnjë sipas njoftimit të Gjykatës, dyshohet se, së bashku me katër persona të tjerë, e ka privuar në mënyrë të kundërligjshme nga liria të dëmtuarin, duke e mbajtur të mbyllur.
Ndërkaq, gjatë vitit 2026, në periudha të ndryshme kohore, E.R. dyshohet se ka përdorur forcë dhe kanosje serioze për ta detyruar të dëmtuarin të mos japë deklarata dhe informacione të vërteta para prokurorisë, me qëllim të pengimit të procedurës penale.
Gjykata ka vlerësuar se ekziston rrezik i ikjes, pasi i pandehuri kishte qenë në arrati që nga janari i vitit 2026 dhe kërkohej nga organet e drejtësisë për disa vepra penale.
Po ashtu, gjykata konsideroi se ekziston rreziku që, nëse lihet në liri, ai të ndikojë te i dëmtuari dhe dëshmitarët ose të pengojë zhvillimin e procedurës penale.
Për këto arsye, gjykata vlerësoi se masa e paraburgimit është e domosdoshme për të siguruar praninë e të pandehurit dhe zhvillimin e papenguar të procedurës penale.
