Gjykata Themelore ia ka caktuar një muaj paraburgim Igor Popoviqit, ndihmësdrejtor i të ashtuquajturës Zyrës për Kosovën në Qeverinë e Serbisë.
Prokuroria Speciale kishte kërkuar që Popoviqit t’i caktohet masa e paraburgimit.
Vendimi është marrë në seancën e mbajtur të dielën.
“Gjyqtari i procedurës paraprake ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit ndaj të pandehurit I.P., ashtu që të njëjtit i është caktuar masa e paraburgimit në kohëzgjatje prej 1 (një) muaj. Pas mbajtjes së seancës dëgjimore, gjykata vlerësoj se caktimi i masës së paraburgimit në këtë çështje penale është masë adekuate në këtë rast penal dhe se çdo masë tjetër do të ishte e pamjaftueshme për zbatimin e suksesshëm të procedurës penale, si dhe pengimin e rrjedhës normale të kësaj procedure penale”, thuhet në njoftimin e Gjykatës Themelore të Prishtinës.
Popoviq ishte arrestuar të premten në pikë kalimin në Bërnjak psi në një fjalim në një fshat në Rahovec, e kishte quajtur Ushtrinë Çlirimtare të Kosovës organizatë terroriste.
“Kjo është sikur të përpiqesh të mbash një fjalim në Jeruzalem, aty ku ka vuajtur Krishti. Vëllezërit tanë kanë vuajtur sepse terroristët e UÇK-së nuk i donin serbët në këto anë, dhe me ekzekutimin e tyre donin të frikësonin popullsinë tjetër serbe, në mënyrë që të largohej nga ky rajon”, kishte thënë ai.
Për këtë rast ka reaguar edhe ministri në detyrë i Punëve të Brendshme.
Ai ka thënë se Kosova është shtet demokratik, por nuk do të lejojë të përdhoset lufta çlirimtare.
Deklaratën e tij e kanë dënuar edhe organizata e dala nga lufta e UÇK-së.
Ndërsa, Serbia ka kërkuar lirimin e Popoviqit.
