Prishtinë- Gjykata Themelore në Prishtinë ka caktuar masën e paraburgimit në kohëzgjatje prej 30 ditësh ndaj të dyshuarit A.S., lidhur me akuzën për vrasjen e V.B., të hënën në “Interex”, në Podujevë.
Lajmin e ka konfirmuar zëdhënësja e Gjykatës Themelore në Prishtinë, Mirlinda Gashi.
Ai dyshohet se ka kryer veprën penale “Vrasje e rëndë në bashkëkryerje”.
Lidhur me të dyshuarin tjetër i cili gjendet ende në arrati, “Betimi për Drejtësi” ka kontaktuar me prokurorin e rastit, Ilaz Beqiri, i cili tha se ende nuk kanë informacione për vendndodhjen e tij.
Sipas Policisë, gjatë kontrollit në banesën e të dyshuarit që u arrestua lidhur me rastin, është gjetur një pistoletë me katër karikatorë dhe 62 fishekë, një pushkë gjuetie me dylbi, 20 fishekë, dy antiplumba dhe një veturë me targa të huaja.
“Në lidhje me rastin është arrestuar një i dyshuar mashkull kosovar, nën dyshimin e bazuar se i njëjti është i përfshirë në kryerjen e veprës së lartcekur bashkë me të dyshuarin i cili dyshohet se kishte kryer vrasjen dhe ishte larguar nga vendi i ngjarjes. Po ashtu lidhur me rastin njësitë policore të shoqëruara nga prokurori kujdestar gjatë bastisjes në shtëpinë dhe objektet përcjellëse të personit të arrestuar kanë gjetur dhe konfiskuar: një pistoletë me katër karikatorë dhe gjashtëdhjetë e dy (62) fishekë, një pushkë gjuetie me dylbi, njëzet fishekë (20), dy antiplumba dhe një veturë me targa të huaja”, thuhej në njoftim.
Ndryshe, në vendin e ngjarjes, e plagosur kishte mbetur edhe bashkëshortja e tani të ndjerës. /BetimipërDrejtësi
