Komisioni Qendror i Zgjedhjeve ka njoftuar se procesi zgjedhor në katër komunat në veri të vendit është zhvilluar pa ndonjë problem, përcjell teve1.info
Kryeari i KQZ-së, Kreshnik Radoniqi bëri të ditur se në këto zgjedhje kanë marrë pjesë 1.567 qytetarë apo 3.47 %.
Leposaviq – 141 votues, apo 1.06%
Zubin Potok – 385 votues, apo 5.78 %
Zveçan – 204 votues apo 2.92 %
Mitrovicë e Veriut – 837 votues, apo 4.62%
Sipas këtyre shifrave, pjesëmarrja më e madhe e qytetarëve ishte në Mitrovicën e Veriut.
KQZ-ja po ashtu ka bërë të ditur se rezultatet preliminare pritet të dalin pas orës 20:00.
Në komunën e Zubin Potokut, vetëm në qendrën e votimit në shkollën “Osman Rama”, kanë votuar qytetarët, që numri i përgjithshëm është 385. Ndërsa, në Velje Breg, Jasenovik dhe Bërnjak nuk ka dal asnjë qytetar të votojë.
Numri i qytetarëve me të drejtë vote në katër komunat në veri ka qenë 45 mijë e 95, teksa për kryetarë kanë garuar 10 kandidatë, dhe vetëm një është nga komuniteti serb.
Mitrovica e Veriut është komunë në të cilën kanë të drejtë vote 18 mijë e 118 votues, të shpërndarë në pesë qendra të votimit. Kandidatët për kryetar në këtë komunë janë Betim Osmani nga Iniciativa Qytetare Mitrovica, Taulant Kelmendi nga Partia Demokratike e Kosovës, dhe Erden Atiq nga Lëvizja Vetëvendosje.
Në komunën e Leposaviqit të drejtë vote kanë 13 mijë e 318 votues, të shpërndarë në pesë qendra të votimit, ku kandidatë janë Albulena Behluli-Hetemi nga PDK dhe Lulzim Hetemi nga LVV.
Në Zveçan janë 6 mijë e 998 votues. Kandidatë janë Ilir Peci nga PDK, Sllagjana Pantoviq, kandiate e pavarur dhe Fetah Peci nga LVV.
Në Zubin Potok janë 6 mijë e 661 votues, ku kandidatë janë Izmir Zeqiri nga PDK, dhe Flatron Hasani, LVV.
