“Do të kërkoj deri në fund për vëllain”
Zahide Jani, mes emocionesh të mëdha, rrëfen se prej më shumë se dy dekadash jeton me dhimbjen dhe mungesën e vëllait të saj, Reshatit, i cili u zhduk gjatë luftës në Kosovë.
“Kanë kaluar 27 vite me dhimbje për të gjithë familjarët që nuk dinë asgjë për fatin e më të dashurve të tyre. Kam shpresë se një ditë të gjithë do të gjenden, përfshirë edhe vëllain tim, Reshatin. I bëj thirrje institucioneve të Kosovës të punojnë më shumë për çështjen e të zhdukurve. Do t’iu lutesha të gjithëve, sidomos Presidentes Vjosa Osmani dhe Kryeministrit Albin Kurti”, ka thënë Jani.
Plagë të hapura mban edhe Mustaf Hajdini nga Komuna e Malishevës. Ai tregon se këtë muaj bëhen plot 27 vite që nuk di asgjë për fatin e babait të tij.
Pas gjithë këtyre vitesh zhgënjimi, ai thotë se forcën e gjen vetëm te Zoti.
“Shpresat nuk do t’i humbas kurrë, sepse nuk i dihet fatit. Unë besoj shumë në Zot dhe mendoj se disa gjëra janë të përcaktuara ashtu. Mund të ndodhë që kjo situatë të vazhdojë edhe për vite të tëra, ose mund të ndodhë që një ditë e vetme të na sjellë të vërtetën”, ka thënë Hajdini.
Dhimbjet e shumë familjarëve kanë inspiruar artisten Dea Gjinovci që të krijojë një memorial të veçantë kushtuar personave të pagjetur.
Në këtë memorial, familjarët do të shkruajnë emrat e më të dashurve të tyre që u zhdukën gjatë luftës.
“Simbolika e këtij memoriali është ‘Pema e Jetës’, e cila i kushtohet të gjithë personave të pagjetur në Kosovë. Brenda memorialit do të vendoset një dru ku do të shkruhen emrat e tyre. Kjo është diçka që më prek edhe mua personalisht, pasi kam gjyshen të zhdukur. Besoj se arti i bashkon njerëzit dhe ngjall emocione të forta”, ka thënë Gjinovci.
Ky projekt mbështetet nga Fondi për të Drejtën Humanitare.
Gjatë luftës në Kosovë u vranë mbi 13.000 civilë, ndërsa rreth 1.600 persona, kryesisht shqiptarë, ende figurojnë të zhdukur.
