Dronët izraelitë u panë gjerësisht mbi kryeqytetin libanez, Bejrut, dhe zonat përreth të hënën, duke hedhur gjithashtu granata tymuese në një qytet jugor – një tjetër shkelje kjo e marrëveshjes së armëpushimit të vitit të kaluar, raportuan mediat libaneze.
Sipas agjencisë shtetërore NNA, mjetet ajrore pa pilot u ulën në lartësi të vogël mbi Khalde në Bejrut dhe mbi zonën Ghaziyeh, duke u drejtuar drejt Haret Saida dhe Aramoun në jug të vendit.
Transmetuesi lokal raportoi se një dron izraelit lëshoi katër granata tymuese në periferi të qytetit kufitar jugor Aitaroun.
Bashkia e Aitarounit deklaroi se të hënën në mëngjes kishte evakuuar ambientet e saj pas marrjes së një “alarm sigurie” për një sulm të mundshëm me dron në zonë.
Ajo u kërkoi banorëve të “ushtrojnë kujdes”, ndërsa vendndodhja e saktë e incidentit ende nuk dihet.
Tensionet në jug të Libanit kanë qenë në rritje prej javësh, me ushtrinë izraelite që ka shtuar bombardimet pothuajse çdo ditë duke synuar, sipas raportimeve, anëtarë dhe strukturë të Hezbollahut.
Që nga tetori 2023, sulmet izraelite kanë vrarë mbi 4,000 persona dhe kanë plagosur gati 17,000 të tjerë, duke u shndërruar në një ofensivë të gjerë në shtator 2024.
Sipas marrëveshjes së armëpushimit të nëntorit 2024, ushtria izraelite duhej të tërhiqej plotësisht nga jugu i Libanit në janar, por realizoi vetëm një tërheqje të pjesshme dhe vazhdon të mbajë një prani ushtarake në pesë pika kufitare.
