Ka 26 vite që pret për kthimin e trupit të djalit të tij, Hakisë.
Ragip Gashi, jetën e ka kthyer në pritje e shpresë, duke kërkuar ende një shenjë të të birit, i cili iu vra më 26 mars të vitit 1999 në lagjen “Dardania” të Prishtinës.
Ai rrëfen për ditën kritike, ku forcat serbe morën dhunshëm disa të rinj dhe i futën në një depo.
Sipas, Gashit, në mesin e tyre ishte dhe djali i tij Hakiu.
Për gjithë ngjarjen, Gashi kishte kuptuar nga një fqinje.
Pas kësaj ngjarje Gashi kishte shkuar në Maqedoni.
E vdekjen e djalit, nuk ua kishte kumtuar fëmijëve dhe gruas dhe një pjesë të familjarëve.
E një ditë pas kthimit në Kosovë, e kishte gjetur një rrobë të djalit.
“Qaty i kanë marrë në rrugë i kanë shti ne depo edhe i kanë pushkatu djali i madh e ka ditë. Unë në Maqedoni 3 muj ditë këta tjert asnjo deri jemi kthy e kur jemi kthy qathere ju kemi kallzu. Po duhet me bo sabër spo ki qa me bo me gjetë bile veç një shenjë tij dikun bile e dimë që dikun e ka një shejë po s’ka aty kur jemi kthy prej Maqedonie ja kemi gjet një xhamper një rrobë tij në shportë të mbeturinave.”, tha familjari, Ragip Gashi.
Që prej asaj dite 83-vjeçari pret një lajm për djalin.
Gashi rrëfen edhe pritjet e pafundme në Merdare, gjithmonë me shpresën se mes arkivoleve do të ishte edhe i biri.
“Me deshtë ata qe i kanë marrë munden me ditë ma mirë se ku jonë edhe me i zbulu edhe me i gjet qato kufoma po nuk e di. 19 herë jom kon në Merdare tu prit kufoma qathere i kemi prit qato kufoma aty kan ardhë po i joni jo”.
Ndërkohë, nga Këshilli i Familjarëve të Personave të Pagjetur thonë se gërmimet në Serbi, po i pengon qëllimshëm Beogradi duke e politizuar çështjen.
“Varrezat që i ka bart Serbia për ta fshehur krimin dhe për ti shfrytëzu ato varreza politikisht siç po shihet edhe sot ato dmth janë në Serbi edhe e dimë saktësisht ku jonë e janë dëshmitarët okularë vetë serb janë ku tregojnë që është varrezë masive tash Serbia e neglizhon lshumjen e lejës për me bo ek…., e bllokadë jo sot skemi kohë jo skemi teknikë si gjithmonë dhe Serbia këtë problem e bënë për shkak të djemëve tanë që janë në Hagë sepse pot zbulohet një varrezë masive me 200 trupa në Serbi do të pëlcasë një bombë në shtetin serb dhe për këtë e shfrytëzon politikisht”, tha Ahmet Grajqevci.
Aktualisht në Kosovë janë rreth 1 mijë e 600 persona që figurojnë si të zhdukur nga lufta e fundit në Kosovë.
Kronikë e realizuar nga gazetarja, Jona Kelmendi.
