Kryeministri në detyrë, Albin Kurti, ka folur për herë të parë publikisht për anëtarësimin e Kosovës në Bordin e Paqes, një javë pasi vendi u bë pjesë e kësaj organizate ndërkombëtare.
Kurti theksoi se Kosova është e gatshme të kontribuojë për paqen kudo në botë, duke përmendur si hap të parë përfshirjen në Forcën Ndërkombëtare të Stabilizimit.
“Pjesëmarrjen e kemi nisur përmes Forcës Ndërkombëtare Stabilizuese, ku Kosova u përfaqësua në konferencën në Doha nga komandanti i FSK-së, Bashkim Jashari”, deklaroi Kurti.
Ai shtoi se Republika e Kosovës ka shprehur interesim që të jetë pjesë aktive e kësaj force, duke vënë në pah kapacitetet e Forcës së Sigurisë së Kosovës në fusha si kërkim-shpëtimi dhe deminimi.
“FSK-ja është e njohur për profesionalizmin e saj dhe ne kemi shprehur gatishmërinë që, përveç pjesëmarrjes në terren, të jemi edhe pjesë e strukturave vendimmarrëse politike të kësaj force ndërkombëtare. Procesi do të vazhdojë edhe më tej”, tha ai.
Duke rikujtuar se është ende kryeministër në detyrë, Kurti theksoi se angazhimi për paqen mbetet prioritet i Kosovës.
“Edhe pse nuk jam ende në mandatin tim të tretë, ne besojmë se Kosova duhet të kontribuojë për paqen globale. Ne kemi qenë përfitues të paqes përmes forcave ndërkombëtare në vendin tonë dhe tani duam të japim kontributin tonë me kapacitetet që kemi”, u shpreh Kurti.
Sa i përket situatës humanitare në Gaza, Kurti konfirmoi se Qeveria e Kosovës ka ndarë 500 mijë euro ndihmë financiare dhe se ky angazhim do të vazhdojë edhe në të ardhmen.
