Një person ka vdekur dhe dy të tjerë kanë pësuar lëndime në një aksident trafiku që ka ndodhur në fshatin Novosellë të Kamenicës të dielën pas orës 18:00.
Sipas Policisë së Kosovës aksidenti ka ndodhur pasi drejtuesi i veturës dyshohet se nga pakujdesia dhe mospërshtatja e shpejtësisë me kushtet e rrugës ka humbur kontrollin mbi veturë dhe ka dalë jashtë rrugës duke goditur kështu anësoret e metalit.
Ai bashkë me një pasagjerë tjetër që ishte në veturë kanë pësuar lëndime trupore.
Policia ka bërë të ditur se drejtuesi i veturës është arrestuar.
“Si pasojë viktima mashkull kosovar/pasagjer në veturë ka ndërruar jetë në vendin e ngjarjes, ndërsa lëndime ka pësuar edhe pasagjeri tjetër mashkull kosovar si dhe vet drejtuesi-i dyshuari. Me vendim të prokurorit, trupi i pajetë i viktimës është dërguar në IML për obduksion, ndërsa i dyshuari-drejtuesi është dërguar në mbajtje”, thuhet në raportin 24- orësh të PK-së.
