Shumë shpejt, Belgjika do ta njoh zyrtarisht praninë e një atasheu ushtarak të Republikës së Kosovës.
Kjo u bë e ditur të enjten nga vet ministri belg i Mbrojtjes, Theo Francken, i cili mbajti konferencë për medie bashkë me homologun e tij, ministrin në detyrë, Ejup Maqedonci.
Ministri belg tha se vendimi vjen pas një kërkese të kahershme nga autoritetet kosovare.
“Është një kërkesë nga autoritetet e Kosovës prej shumë vitesh. Qeveria e re e Belgjikës, merr vendime të qarta. Prandaj, po, duam një atashe ushtarak, një kolonel të lartë për të ardhur në Bruksel si atashe zyrtar i mbrojtjes, Është një hap i madh, i madh diplomatik që të jeni në zemër të Evropës, në Bruksel. Prandaj është shumë e rëndësishme ta kemi atasheun tuaj ushtarak, sa më shpejt që të jetë e mundur”, tha Francken.
Ai theksoi rëndësinë e prezencës së përbashkët në kuadër të misionit të KFOR-it dhe vlerësoi përkushtimin e Kosovës ndaj sigurisë rajonale.
“Vizituam trupat tona në kuadër të KFOR-it. Trupat e KFOR-it janë shumë të rëndësishme për vendin dhe për stabilitetin në Ballkan. Dhe mendoj se për ne është shumë e rëndësishme ta kemi këtë mision bashkë me vendet e Beneluksit, me të trija vendet e Beneluksit. Kemi pilotë të dronëve që punojnë këtu. Dhe kjo është hera e parë pas 10 vjetësh që kemi sërish shumë njerëz në territorin tuaj për të mbrojtur edhe Kosovën”, tha ministri i Mbrojtjes së Belgjikës.
Ndërkohë, ministri në detyrë i Mbrojtjes së Kosovës, Ejup Maqedonci, e cilësoi këtë vendim si një lajm të jashtëzakonshëm për vendin.
“Faleminderit për këtë lajm të jashtëzakonshëm për vendin tonë, këtë lajm me peshë të madhe që Belgjika, kryeqyteti i dy destinacioneve kryesore të vendit tonë, NATO-s dhe BE-së, po njeh praninë e atasheut të mbrojtjes së Kosovës pikërisht në Bruksel që na jep mundësinë për të thelluar bashkëpunimin me Belgjikën si një vend i yni partner, por gjithashtu na jep mundësinë që të jemi edhe më afër pikërisht NATO-s dhe BE-së me prezencën tonë ushtarake në Bruksel”, tha Maqedonci.
Maqedonci gjatë ditës priti me nderime të larta shtetërore, edhe ministren e Mbrojtjes së Luksemburgut, Yuriko Backes.
