Një grua ka humbur jetën si pasojë e lëndimeve të marra në aksidentin e trafikut që kishte ndodhur më 17 korrik 2026 në Mitrovicë.
Sipas raportit 24-orësh të Policisë së Kosovës, viktima ishte njëra nga gjashtë personat e lënduar në përplasjen e dy automjeteve. Policia është njoftuar më 22 korrik nga Qendra Klinike Universitare e Kosovës se e lënduara nuk ka arritur t’u mbijetojë plagëve.
Sipas hetimeve fillestare, aksidenti dyshohet se ka ndodhur pasi një vozitës, nga pakujdesia, ka goditur një automjet tjetër që drejtohej nga një grua.
Si pasojë e përplasjes, lëndime trupore pësuan të dy drejtuesit e automjeteve dhe katër pasagjere, të cilat u dërguan për trajtim mjekësor.
“Dyshohet se vozitësi mashkull kosovar me veturë nga pakujdesia ka goditur veturën tjetër me vozitëse femër kosovare. Si pasojë janë lënduar të dy vozitësit dhe katër pasagjeret femra kosovare, të cilët janë dërguar në tretman mjekësor. Më 22.07.2026 nga QKUK është njoftuar që njëra nga të lënduarat femër ka ndërruar jetë. Me vendim të prokurorit trupi i pajetë i viktimës është dërguar në Institutin e Mjekësisë Ligjore për obduksion”, thuhet në raportin e Policisë së Kosovës.
Rasti është duke u trajtuar nga organet kompetente, ndërsa hetimet për zbardhjen e plotë të rrethanave të aksidentit janë në vazhdim.
