Nesër fillon sezona dimërore, me ç’rast nëse automjetet nuk janë të pajisura me përgatitjet dimërore, shoferët do të gjobiten. Andaj ditën e fundit të afatit kohor për ndërrimin e gomave, numri i qytetarëve të interesuar ishte më i madh se zakonisht. Krahas kësaj, përveç përgjegjësisë individuale, sqarohet rëndësia e këtij procesi.
Radha e pritjes ishte e gjatë.
Kjo gjendje shihet një ditë para fillimit të sezonës dimërore, ku të gjitha makinat duhet të përgatiten për kushtet atmosferike.
E meqë e marta ishte data e fundit për ndërrimin e gomave, fluksi i shoferëve ishte më i madh.
Andaj, “pritjet e gjata” po cilësohen si shkak i neglizhencës të këtij procesi deri në datën e fundit.
“Sa të mundemi po. Me kohë mundohemi mi ndërru. Nganjëherë vonojmë por kur po është kolonë qështu po pritojmë me qëndru, a pe sheh që dy orë tu qëndru këtu”, tha shoferi Fitim Krasniqi.
Megjithatë, pati edhe shofer të tillë që këtë procedurë e kanë kryer qysh moti.
“Nja një muaj më herët i kryj gjithë, dmth para kohës i ngjes. Se janë dënimet, mandej edhe aksidentet me fatalitet. Kështu ma mirë është më herët me i ndërru”, tha shoferi Bardhyl Berisha.
“Jam shumë e përgjegjshme, çdo vit kur vjen koha, rregullisht i ndërroj gomat. Gjoba kam pas për shpejtësi, por jo kështu”, u shpreh shoferja LIridona Berani.
“Gjithmonë i ndërroj gomat brenda afatit kohor. Jam i kujdesshëm për këto sene dhe nuk ka ndodh me më dënu”, us hrpeh shoferi Enver Hetemi.
“Gomat i ndërroj çdo vit me kohë, policia nuk ka pas shanca me më dënu se çdo vit i ndrroj me kohë”, deklaroi shoferi Adem Haziri.
Njohësi i fushës së komunikacionit, Bekim Ahmeti sqaron rëndësinë e paisjes së automjetit për stinën e dimrit.
“Si individ dhe në përgjithësi si kolektiv, duhet të kemi parasysh se ndërrimi i gomave është njësoj sikurse ndërrimi i këpucëve, që njeriu nuk mundet me shku në punë apo diku tjetër me këpucë të verës ose të dimrit kur i ngatërrojmë sezonën. Përveç kësaj që është përgjegjësi individuale, kemi edhe përgjegjësi kolektive sepse mund t’i shkaktojmë dëme palës së tretë”, tha njohësi i fushës s komunikacionit, Bekim Ahmeti.
Policia e Kosovës, të hënën u bëri apel qytetarëve përmes rrjeteve sociale për përgatitje të automjeteve për fillimin e sezonës dimërore.
Në të kundërt, personat që veprojnë në kundërshtim me Ligjin për Rregullat e Trafikut Rrugor, pësojnë gjoba prej 40 eurosh.
