Para një dekade, Kombëtarja e Kosovës në futboll ka zhvilluar ndeshjen e parë zyrtare nën patronatin e FIFA-s. Më datën 5 mars të vitit 2014, Kosova luajti ndeshje miqësore me Haitin, e cila përfundoi pa gola dhe u zhvillua në stadiumin olimpik “Adem Jashari” në Mitrovicë.
Federata e Futbollit të Kosovës (FFK), ka shkruar se kjo ndeshje shënoi një kapitull, një rrugëtim triumfal për Kombëtaren e Kosovës, duke pasur parasysh se në fillim të vitit 2014 FIFA i dha dritën e gjelbër “Dardanëve” për të zhvilluar miqësore. Miqësorja me Haitin i parapriu pranimit të plotë të FFK-së, në FIFA dhe UEFA, I cili erdhi në muajin maj të vitit 2016.
“Ndeshja kundër Haitit nuk ishte vetëm një konfrontim sportiv; ishte një dëshmi e fuqishme se Kosova ishte gati dhe e meritonte të ndihej e barabartë në skenën ndërkombëtare të futbollit, për t’i dhënë fund izolimit të padrejtë për më shumë se dy dekada”, ka shkruar FFK-ja, të martën.
Prej 72 ndeshjeve zyrtare dhe miqësore që nga ajo kohë, Kosova ka regjistruar 25 fitore, 18 barazime dhe 29 humbje, ndërsa FFK-ja ka krijuar të gjitha ekipet zinxhir të kombëtares në të dyja konkurrencat.
“Në këtë ditë, kthehemi në retrospektivë për të falënderuar çdo futbollist, trajner, drejtues klubesh, donator dhe punonjës sportiv që kanë dhënë kontributin e tyre me pasion dhe përkushtim për futbollin e Kosovës. E tani është koha që të gjithë bashkë të kontribuojmë për suksesin e shumëpritur”, ka shkruar ndër të tjera FFK-ja.
Sigurisht, ëndrra e madhe e Kombëtares së Kosovës mbetet kualifikimi në Evropian dhe Botëror, ndërsa këtë vit do të paraqitet në Ligën C të Ligës së Kombeve.
