Ministri në detyrë i Punëve të Brendshme, Xhelal Sveçla ka thënë se armatimi i sekuestruar në fshatin Vallaq të Zveçanit, sipas informacioneve që ai ka është gjetur në objektin që i përket politikanit Aleksandar Arsenijevic.
Ai në një reagim në Facebook ka thënë se krimi nuk mund të fshihet kurrë duke përgëzuar institucionet që siç ka thënë ai po punojnë pa u ndalur në ofrimin e sigurisë.
Sveçla ka thënë se armatimi i sekuestruar ishte i mjaftueshëm për njësit terrorist.
“Një arsenal i tërë i mjaftueshëm për një njësit terrorist. Sipas informacioneve që kam pranuar, armatimi i rëndë është gjetur në një objekt që i përket politikanit Aleksandar Arsenijevic. Krimi nuk mund të fshihet kurrë, pavarësisht petkut që vesh. Veçanërisht përballë institucioneve tejet vigjilente e profesionale që po punojnë pa u ndalur në ofrimin e sigurisë e sundimit të rendit e ligjit në çdo cep të territorit të Republikës së Kosovës. Nuk do të ndalemi derisa në çrrënjosjen e plotë të mbetjeve kriminale e terroriste të Serbisë nga vendi ynë”, ka shkruar Sveçla.
Policia e Kosovës ka njoftuar se armatimi është gjetur pas marrjes së infromacionëve se në atë lokacion mund të ketë armë ku për këtë rast është intervistuar edhe një person.
