Një ngjarje e rëndë ka ndodhur pasditen e së hënës në Shkodër, ku një 38-vjeçar është mbytur pasi është futur për t’u larë në liqenin e Grizhes.
Sipas njoftimit të policisë, 38-vjeçari E.N. ishte futur rreth orës 19:00 të së hënës në ujërat e liqenit, ndërsa trupi i pajetë i tij është gjetur rreth orës 00:15 të së martës, pas disa orësh kërkimesh nga policia kufitare.
“Më datë 03.06.2025, rreth orës 00:15, Policia ka marrë njoftim se shtetasi E. N., 38 vjeç, rreth orës 19:00, ishte futur për t’u larë në liqenin e Grizhes dhe ishte mbytur. Shërbimet e DVP Shkodër dhe shërbimet e Policisë Kufitare, pas disa orësh kërkime, kanë gjetur dhe kanë nxjerrë nga uji, trupin e pajetë të shtetasit E. N. Nga veprimet e para hetimore dyshohet se ai ka humbur jetën pasi ka pësuar arrest kardiak, ndërkohë që lahej në liqen. Grupi hetimor vijon punën për zbardhjen e rrethanave të rastit dhe dokumentimin e shkakut të humbjes së jetës së 38-vjeçarit”, thuhet në njoftimin e policisë.
