Nisma Socialdemokrate ka kritikuar kryetarin e Partisë Demokratike të Kosovës, Memli Krasniqi për takimin me kryeministrin e Kosovës, Albin Kurti.
Sipas kësaj partie, takimi amniston keqqeverisjen e brendshme por edhe legjitimon kursin diplomatik të kësaj qeverie.
Në reagim thuhet se Krasniqi para koordinimit me opozitën u dakordua me Kurtin.
“I pamatur e i dëmshëm, veprimi politik i cili në vete jo vetëm se amniston keqqeverisjen e brendshme të Albin Kurtit, por edhe legjitimon kursin e gabuar diplomatik të kësaj qeverie. Kosovës i ka munguar zëri opozitar, andaj kërkesa për bashkërendimin e opozitës ka qenë natyrale, derisa hezitimi për të qenë pjesë e një fronti të bashkuar tanimë po deshifrohet me nxitimin e Memli Krasniqit, i cili para koordinimit me opozitën zgjodhi të dakordohet me Albin Kurtin”, thuhet në komunikatën e Nismës.
Sipas kësaj partie opozita duhet të bashkohet për rrëzimin e Kurtit përmes mocionit të mosbesimit.
“Në rrethanat aktuale, opozita duhet ta ketë vetëm një qëndrim të përbashkët, dorëheqjen e Albin Kurtit apo shkarkimin përmes mocionit, i cili do të rezultonte me shpërbërjen e Kuvendit dhe shkuarjen në zgjedhje! Shpërndarja e Kuvendit pa dorëheqje ose shkarkim të qeverisë është bartje e fajit nga qeveria te Kuvendi edhe pse përgjegjës për degradim të tërësishëm të shtetit në të gjitha sferat e jetës është qeveria dhe jo Kuvendi. Prandaj, NISMA Socialdemokrate u bën thirrje deputetëve të të gjitha partive të mos pranojnë të shkarkohen nga qeveria por të thërrasin seancë dhe ta shkarkojnë qeverinë!”, thuhet në komunikatë.
LDK e AAK kanë refuzuar ftesën e Kurtit për një darke pune me liderët opozitarë ku do të diskutohej për agjendën legjislative./teve1.info/
