Sipas NISMA-s, kjo deklaratë është skandal i rëndë dhe i pafalshëm.
“Deklarata e ministrit të financave Hekuran Murati se; ‘më lirë do të na kushtonin mercenarët sesa UÇK-ja’ është skandal i rëndë dhe si i tillë është i pafalshëm për një bartës të një funksioni publik. Një deklaratë e tillë nga një zyrtar i lartë qeveritar fyen rëndë vuajtjet e shekullore të popullit shqiptar! Fyen rëndë mijëra dëshmorë dhe martirë të cilët dhanë jetën për çlirimin e vendit! Fyen rëndë çdo luftëtar të UÇK-së. Fyen rëndë qindra fëmijë të vrarë në mënyrë mizore nga barbaria serbe! Fyen rëndë mbi 20 mijë gra e vajza të dhunuara gjatë luftës!”, thuhet në reagimin e tyre.
Përveç kërkesës për dorëheqje të ministrit Murati, NISMA po ashtu ka kërkuar edhe distancim publik të kryeministrit Albin Kurti nga kjo deklaratë.
“Liria nuk është pazar, siç e sheh mercenari, Hekuran Murati! Prandaj, NISMA Socialdemokrate kërkon dorëheqje të menjëhershme të Hekuran Muratit nga posti i Ministrit të Qeverisë së Kosovës si dhe distancim publik të kryeministrit Albin Kurti nga kjo deklaratë skandaloze!”, thonë nga NISMA.
Dje në media ka qarkulluar një status i ministrit Murati nga viti 2016, ku fliste për luftën e UÇK-së. Ky status ka shkaktuar reagime të shumta në vend. /Teve1.info/
