Kanë nisur zyrtarisht punimet për restaurimin e Xhamisë së Vjetër të Orllanit, një objekt me rëndësi historike dhe fetare në Komunën e Podujevës.
Në ceremoninë e fillimit të punimeve morën pjesë ministrja e Kulturës, Saranda Bogujevci, sekretari i MKT-së Bislim Bislimi, kryetari i Komunës së Podujevës Shpejtim Bulliqi, si dhe kryeimami i Bashkësisë Islame të Kosovës, Vedat Sahiti, së bashku me zyrtarë dhe përfaqësues të institucioneve të tjera.
Xhamia e Vjetër e Orllanit është ndërtuar fillimisht në shekullin XVIII, ndërsa forma ekzistuese e saj daton nga vitet ’60. Ajo u dogj gjatë luftës së fundit në vitin 1999 dhe ka mbetur për vite në gjendje të rënduar.
Në njoftim është thënë se restaurimi i saj po realizohet në bashkëpunim me Bashkësinë Islame të Kosovës, ndërsa projekti kap vlerën rreth 500 mijë euro.
