Ministri i Infrastrukturës, Dimal Basha, ka bërë të ditur se janë duke vazhduar punimet për zgjerimin e rrugës QMI–Lipjan (N25), një projekt që synon përmirësimin e qarkullimit dhe rritjen e sigurisë rrugore në këtë segment.
Sipas Bashës, projekti përfshin zgjerimin e një pjese të rrugës me gjatësi prej 3.8 kilometrash, ndërsa vlera kontraktuale e investimit arrin në 6.8 milionë euro.
Ministri theksoi se gjatë realizimit të punimeve janë hasur disa sfida që lidhen me infrastrukturën nëntokësore, përfshirë rrjetin e ujësjellësit dhe mungesën e kanalizimit fekal.
“Gjatë realizimit të punimeve janë paraqitur disa sfida që lidhen me infrastrukturën nëntokësore, si ujësjellësi dhe mungesa e kanalizimit fekal. Për adresimin e tyre, jemi në diskutim dhe koordinim të vazhdueshëm me të gjithë akterët përgjegjës, në mënyrë që rruga të realizohet me cilësi dhe brenda afatit të paraparë. Pengesa gjatë punimeve mund të ketë, por do të qëndrojmë afër projektit dhe do t’i adresojmë problemet me kohë, me synimin që punimet të përfundojnë sa më shpejt dhe sa më mirë”, ka deklaruar Basha.
Ai shtoi se institucionet do të vazhdojnë koordinimin me të gjitha palët përgjegjëse për të tejkaluar pengesat dhe për të siguruar që projekti të përfundojë sipas standardeve dhe afateve të planifikuara.
