Ministri në detyrë i Financave, Punës dhe Transfereve, Hekuran Murati, ka njoftuar se nga sot ka hyrë në fuqi zbatimi i masës për mbulimin e kostos së policës kufitare të sigurimit për mërgimtarët.
Sipas Muratit, polica 1-mujore e sigurimit për të gjitha automjetet deri në 9 pasagjerë mund të merret falas në të gjitha pikat kufitare hyrëse të Kosovës.
“Kjo masë lehtësuese është pjesë e angazhimit të Qeverisë së Kosovës për të mbështetur mërgatën dhe për të lehtësuar qasjen dhe lëvizjen e tyre gjatë qëndrimit në vendlindje,” ka shkruar Murati në njoftimin e tij.
Ky vendim pritet të ndikojë pozitivisht në uljen e barrës financiare për mërgimtarët që vizitojnë Kosovën gjatë sezonit veror dhe vjen si pjesë e politikave të qeverisë për fuqizimin e lidhjeve me diasporën.
