Për herë të parë në Kosovës ka filluar vaksinim i vajzave kundër kancerit të qafës së mitrës.
Në një njoftim të Komunës së Prishtinës thuhet se ky është një hap i rëndësishëm për shëndetin e vajzave.
“Në mëngjesin e sotëm, nxënëset e moshës 11 vjeçare, të shkollës Model “Qamil Batalli” në Prishtinë, u vaksinuan me vaksinën Human Papilloma Virus (HPV). Vaksina HPV ka një rëndësi të jashtëzakonshme për shëndetin e vajzave, duke ofruar një mbrojtje efektive kundër kancerit të qafës së mitrës; një sëmundje që po shfaq një rritje shqetësuese në numrin e rasteve”, thuhet në njoftim.
Tutje thuhet se nënkryetarja e kryeqytetit, Jehona Lushaku Sadriu bashkë me drejtorin e Drejtorisë së Shëndetësisë, Izet Sadiku vizituan shkollën “Qamil Batalli” – ku filloi vaksinimi.
“Fillimi i vaksinimit në moshën 11 vjeçare për vajzat, është zgjedhur për shkak të efektivitetit të saj të lartë në këtë fazë, duke mbrojtur deri në 99% të grave nga ky rrezik në të ardhmen. Ky lajm pozitiv për vaksinimin është i rëndësishëm për të gjitha vajzat, duke ofruar mbrojtje të duhur për t’i parandaluar këto sëmundje” – deklaroi nënkryetarja Lushaku.
Vaksinimi me vaksinën HPV do të bëhet në të gjitha shkollat e Kryeqytetit Prishtina./teve1.info
