Shpallja e aktgjykimit për baballarët e tyre është 25 ditë larg.
Prandaj, djali i Rexhep Selimit dhe ai i Jakup Krasniqit, ndezën solemnisht “orën e pritjes” në Prishtinë.
Deri më 16 shtator, ekrani do t’i numëroj një nga një ditët derisa gjyqtari t’i bie çekanit në Hagë.
Në ceremoni morën pjesë edhe familjarë të tjerë të katërshes së UÇK-së, bashkëluftëtarë, politikanë e të burgosur politik.
I pranishëm ishte edhe kryetari I PDK-së, Bedri Hamza, i cili tha se ekrani do të shërbej si simbol i pritjes dhe kujtesës për ish-krerët e UÇK-së që po gjykohen në Hagë.
“Koha po ecën, pritja tash është shkurtuar, por kujtesa jonë nuk shkurtohet. Sa më afër të jetë dita, aq më fuqishëm duhet ta themi atë që duhet ta themi. Ky ekran është simbol i pritjes në Prishtinë, por ekrane të ngjashme do të vendosen në gjithë Kosovën”, deklaroi Bedri Hamza.
E përveç “Orës së Pritjes”, në kryeqytet deri më 16 shtator do të zhvillohen aktivitete të ndryshme, në kuadër të pritjes për rikthimin e katërshes drejtuese të UÇK-së.
“Kjo orë s’ka me i matë veç ditët. Kjo orë ka me na kujtu çdo mëngjes e çdo mbrëmje se pas çdo dite që kalon, një popull po prêt….”, tha Besianë Musmurati, nënkryetare e Komunës së Prishtinës.
Përveç marshit që do të mbahet më 12 shtator, nënkryetarja e Prishtinës tregoi se do të mbahen edhe ligjërata në shkolla, aktivitete në sheshe, seminare me studentë dhe ekspozita.
Ndërkaq, nga platforma “Liria ka Emër”, Ismail Tasholli tha se shpreson që më 16 shtator të nisë një kapitull i ri.
“Ne po shpresojmë që me 16-tin shtator ora e mbrapsht do të fillojë mbarë, sepse kjo shoqëri ka nevojë për orët e bardha”, pohoi Tasholli.
Ish-krerët e UÇK-së ndodhen në paraburgim në Hagë që prej nëntorit të vitit 2020.
