Ish-drejtuesit e FBI-së dhe CIA-s janë vënë nën hetim lidhur me mundësinë e dhënies së deklaratave të rreme përpara Kongresit mbi ndërhyrjen ruse në zgjedhjet presidenciale të vitit 2016, në të cilat Donald Trump fitoi mandatin e tij të parë, sipas raportimeve të mediave.
Ky zhvillim pason publikimin e një raporti nga drejtori aktual i CIA-s, John Ratcliffe, javën e kaluar. Në raport thuhej se John Brennan, ish-drejtori i CIA-s nën administratën Obama, dhe James Comey, ish-drejtori i FBI-së, kishin “manipuluar të dhënat e inteligjencës” në një Vlerësim të Komunitetit të Inteligjencës, të hartuar menjëherë pas zgjedhjeve të vitit 2016, raportoi CNN.
“E gjithë bota tani mund ta shohë të vërtetën: Brennan, ish-(Drejtori i Inteligjencës Kombëtare James) Clapper dhe Comey manipuluan inteligjencën dhe heshtën profesionistët e karrierës – të gjitha për të kapur Trumpin. Faleminderit oficerëve të karrierës së CIA-s që kryen këtë shqyrtim dhe ekspozuan faktet”, tha Ratcliffe në X më 2 korrik, ditën kur publikoi raportin.
CNN raportoi se ende nuk dihet nëse hetimi ndaj ish-drejtuesve të FBI-së dhe CIA-s ka kaluar fazën fillestare. Një zëdhënës i Departamentit të Drejtësisë refuzoi të komentonte, duke thënë: “Ne nuk komentojmë mbi hetime që janë ende në zhvillim”.
Comey u shkarkua nga Presidenti Trump në maj të vitit 2017, ndërsa Brennan dha dorëheqjen më 20 janar të po atij viti, në ditën që Trump mori detyrën. Të dy ishin emëruar nga ish-presidenti Barack Obama.
Për vite me radhë, Trump ka sulmuar publikisht Brennan dhe Comey. I pyetur për hetimin e fundit, ai u tha gazetarëve në Shtëpinë e Bardhë se “Comey dhe Brennan janë njerëz shumë të pandershëm”, duke shtuar: “Mendoj se janë shumë të korruptuar dhe ndoshta duhet të paguajnë një çmim për këtë”.
Brennan dhe Comey udhëhoqën hetimet mbi ndërhyrjen e Rusisë në zgjedhjet amerikane dhe lidhjet e mundshme të fushatës së Trump me zyrtarë rusë – hetime që Trump i ka cilësuar si “mashtrim politik”, megjithëse këto janë mbështetur nga një komision dypartiak i Kongresit dhe nga agjencitë e inteligjencës amerikane.
Trump, i cili prej kohësh e portretizon veten si viktimë të një fushate të padrejtë hetimesh, ka bërë thirrje që drejtësia amerikane të ndjekë penalisht zyrtarët që kanë hetuar atë dhe bashkëpunëtorët e tij.
Pas skandalit Watergate në vitet ’70, gjatë presidencës së Richard Nixon, u vendos një ndarje e qartë mes Shtëpisë së Bardhë dhe Departamentit të Drejtësisë, për të parandaluar ndikimin politik mbi organet e zbatimit të ligjit.
Megjithatë, Trump ka shpërfillur këto norma të papërcaktuara me ligj dhe ka kërkuar në mënyrë të përsëritur që kundërshtarët e tij politikë të ndiqen penalisht.
