Në Gjykatën Themelore në Prishtinë ka nisur gjykimi në mungesë ndaj 21 të akuzuarve për krime lufte në Reçak.
Seanca e parë ishte paraparë të mbahej më 20 korrik, por atëherë gjykimi nuk kishte nisur pasi katër prej të akuzuarve nuk kishin avokatë mbrojtës të caktuar sipas detyrës zyrtare.
Të pandehurit akuzohen për vrasjen e 42 civilëve shqiptarë më 15 janar 1999 në fshatin Reçak. Sipas aktakuzës, ata dyshohen se kanë marrë pjesë në vrasje, tortura dhe shkatërrimin e pasurisë së popullsisë civile shqiptare.
Kryetarja e trupit gjykues, Violeta Namani, tha se gjykata kishte bërë përpjekje për të siguruar praninë e të akuzuarve në proces, përmes komunikimit me autoritetet përkatëse në Serbi.
“Kemi kërkuar të dhëna apo mundësi kontakti me autoritetet serbe, me qëllim që t’u përcjellim të pandehurve se ndaj tyre është duke u zhvilluar një procedurë penale, si dhe njoftimin për caktimin e datës dhe orës së seancës, me qëllim sigurimin e prezencës së tyre. Deri më tani nuk kemi përgjigje nga Ministria e Punëve të Jashtme”, deklaroi Namani.
Ajo shtoi se, duke marrë parasysh natyrën e veprave për të cilat akuzohen dhe përpjekjet e bëra nga gjykata për sigurimin e pranisë së tyre, është vlerësuar se plotësohen kushtet ligjore për zhvillimin e gjykimit në mungesë.
“Meqë nuk prezantohen të pandehurit, duke marrë parasysh se kemi të bëjmë me krime lufte dhe bazuar në legjislacionin në fuqi, erdhëm në përfundim se gjykimi në mungesë mund të mbahet, pasi gjykata ka vërtetuar se janë bërë përpjekjet e mjaftueshme për ta siguruar prezencën e tyre”, tha Namani./ teve1.info/
