Janë komunitete pakicë në Kosovë.
Megjithatë, i gjithë identiteti e trashëgimia kulturore e romëve, ashkalive dhe egjiptianeve zuri vend në sheshin “Adem Jashari” në kryeqytet.
Krejt kjo në kuadër të promovimit të kujtesës kolektive, e cila do shpërfaqet në formën e një muzeu lëvizës.
Prezantimi i këtij muzeu shënoi edhe hapjen e edicionit të tetë të Festivalit Multikulturor dhe Ekspozitës Mobile “Krahu”.
I pranishëm aty ishte edhe kryeministri në detyrë, Albin Kurti.
“Rrugëtimi i këtij festivali është dëshmia se idetë e mira, kur ndërtohen mbi përkushtim, bashkëpunim dhe besim në vlerat e përbashkëta, mund të marrin jetë të gjatë dhe ndikim të gjerë shoqëror. Nga një aktivitet njëditor, festivali sot është bërë një hapësirë ku takohen kultura, komunitete, breza, profesione dhe format e ndryshme të kreativitetit”, tha Kurti.
Siç tha ai, Qeveria ka zbatuar politika konkrete për avancimin e barazisë dhe përfshirjes së këtyre komuniteteve.
“Fushën e arsimit tashmë janë ndarë gati 2 mijë bursa në vlerë prej 625 mijë euro për nxënësit romë, ashkali dhe egjiptian në shkollat e mesme, ku shumica e përfituesve kanë qenë vajza. Po ashtu gjatë viteve 2021-25 janë ndarë afër një milion euro për qendrat mësimore që mbështesin rreth 2 mijë fëmijë nga këto komunitete”, u shprehe kryeministri në detyrë.
E mundësitë e punësimit për komunitetet po vlerësohet se janë më të mëdha tani, se para disa vitesh.
“Sot, pas 15 vitesh, mund të themi me bindje se progresi është i mundur dhe se investimi në përfshirje jep rezultate konkrete. Në fushën e arsimit kemi investuar në modele që kanë ndihmuar ndjeshëm në ngushtimin e hendekut dhe pjesëmarrje dhe rezultate më të mira shkollore ndërmjet fëmijëve rom, ashkali dhe egjiptian dhe pjesës tjetër të shoqërisë”, tha Isak Skenderi – drejtor ekzekutiv i VoRAE.
Ky festival do të vazhdojë me aktivitete të ndryshme kulturore, artistike dhe promovuese, duke synuar forcimin e dialogut, mirëkuptimit dhe bashkëpunimit ndërmjet komuniteteve në Kosovë.
