Ministri në detyrë i Infrastrukturës dhe Transportit, Dimal Basha, ka përcjellë nga afër punimet për asfaltimin e magjistrales për Ferizaj, në segmentin nga Ura e Vogël deri te restoranti “Ballkani”.
Sipas njoftimit të Bashës, traseja nga rruga “Driton Islami” deri te restoranti “Ballkani” pritet të përfundojë me të dyja shtresat e asfaltit dhe të hapet për qarkullim më 5 shtator 2026.
Pas përfundimit të këtij segmenti, punimet e asfaltimit do të vazhdojnë nga rruga “Driton Islami” në drejtim të rrugës “Vëllezërit Gërvalla”.
Ndërkohë, punimet po zhvillohen edhe në segmentin nga rruga “Vëllezërit Gërvalla” drejt Urës së Madhe, ku sipas njoftimit, puna është drejt finalizimit.
“Të dashur qytetarë, po angazhohemi që punimet të ecin sipas planit, në mënyrë që ta lehtësojmë sa më shpejt qarkullimin dhe bizneset tona në Ferizaj të kenë një rrugë moderne dhe me cilësi të lartë”, ka shkruar Basha.
