Profesori Artan Nimani ka deklaruar se nuk pret arritjen e një marrëveshjeje politike për zgjedhjen e presidentit të Kosovës, pavarësisht afatit që po afrohet.
Sipas tij, edhe pse kanë mbetur rreth 11 ditë deri në përfundimin e afatit kushtetues, mungon vullneti i partive politike për të gjetur një zgjidhje.
“Nuk pres që të ketë marrëveshje për zgjidhje, por pres që të kemi marrëveshje për zgjedhje. S’po shihet që ka përpjekje për presidentin, nuk e di se çfarë do të mund të diskutojnë brenda këtyre ditëve të fundit që kanë mbetur”, tha ai në emisionin “Info Nata” në Tëvë1.
Ai ka shtuar se në ditët e fundit mund të ketë intensifikim të takimeve dhe bisedimeve ndërmjet partive politike, por pa ndonjë rezultat konkret.
“Do të kemi përshpejtim të këtyre bisedime mes partive politike, por nuk pres që do të ketë mirëkuptim mes forcave politike në vend”, deklaroi ai.
Sipas Nimanit, situata aktuale politike nuk po prodhon zgjidhje për institucionin e presidentit, duke lënë të hapur mundësinë që vendi të shkojë drejt një procesi tjetër zgjedhor. /teve1.info/
