Artan Nimani nga Nisma Socialdemokrate, në emisionin “Info Nata” në Tëvë1, ka folur rreth moskonstituimit të Kuvendit edhe pas aktgjykimit të Gjykatës Kushtetuese.
Ai tha se propozimi i fundit i Vetëvendosjes nuk i është dukur i sinqertë dhe se emrat e propozuar shpesh janë konfliktualë për raportet me opozitën.
“Unë nuk e di nëse ky propozimi i fundit i VV-së ishte serioz, por përderisa është nominuar do të duhej të ishte serioz. Megjithatë, me siguri ka qenë një hap që ka pasur garancat që nuk do të kalojë si emër. Edhe unë mendoj që VV-ja vazhdimisht po vendos emra të cilët janë konfliktuoz në raport me opozitën, ndonëse me Dimal Bashën patëm përjashtime”, ka deklaruar Nimani.
Duke folur për kandidaturën e Dimal Bashës, ai tha se ajo ishte një befasi jo vetëm për opozitën, por edhe për vetë deputetët e parlamentit.
“Nëse LVV mendon që përfaqësuesi më i mirë i saj është z. Basha, pse të mos jetë Basha? Edhe mosvotimi nga PDK-ja nuk erdhi sepse ata nuk deshën, por për faktin se Dimal Basha ishte befasi të nominohet. Jo vetëm për PDK-në që ka qenë befasi, por edhe për deputetët në atë parlament, si të opozitës ashtu edhe të pozitës”, ka theksuar Nimani.
