Profesori, Artan Nimani ka reaguar ashpër ndaj ekspozitës së fundit “Masakrat në Kosovë 1998-1999”, duke e cilësuar atë si një shtrembërim të rëndë të së vërtetës historike lidhur me luftën në Kosovë.
Sipas tij, pretendimet se në Krushë të Madhe janë vrarë 48 të burgosur të armatosur të UÇK-së janë “turp dhe gënjeshtër e madhe”.
Ai theksoi se ngjarjet në Krushë e Madhe janë të dokumentuara ndryshe, duke përmendur se forcat serbe fillimisht lejuan largimin e grave dhe fëmijëve dhe më pas masakruan burrat civilë.
Nimani kërkoi nga kryeparlamentarja, Albulena Haxhiu që të ndërmarrë masa konkrete lidhur me këtë çështje, duke ngritur shqetësime për përgjegjësinë institucionale.
“Të thuhet që janë vrarë 48 të burgosur të armatosur të UÇK-së, të thuhet që në Krushë të Madhe, Serbia i ka lejuar gratë e fëmijët të largohen pastaj i ka masakruar burrat, kjo është një turp dhe gënjeshtër e madhe. Haxhiu duhet të merr masa konkrete për këtë ekspozitë pse ka ndodh një veprim i tillë, unë e di që parlamenti do duhej të besonte në profesionalizmin e njerëzve që bëjnë veprime të tilla, aq më pak veprime të cilat janë të ndjeshme, reagimi i kryeparlamentares ka qenë një reagim i detyruar për shkak të presionit publik”, ka deklaruar Nimani në emisionin “Ditari” në Tëvë1.
Ndërkohë, Nimani foli edhe për zhvillimet politike në vend, duke u shprehur se Lëvizja Vetëvendosje mund të ndërmarrë hapa të rinj për ta çuar çështjen në Gjykatën Kushtetuese të Kosovës, me qëllim shtyrjen e procesit zgjedhor.
Sipas tij, zgjedhjet që pritet të mbahen të dielën e parë të qershorit mund të shtyhen deri në mesin e korrikut, ndërsa një cikël tjetër zgjedhor mund të zhvillohet në fund të vitit.
“Unë mendoj që LVV do të shpik prapë diçka që do të dërgojë në Gjykatën Kushtetuese prapë këto ditë me qëllim që të shtyhet procesi zgjedhor që është e paraparë te e diela e parë e qershorit, por jo do të shtyhet te mesi i korrikut për zgjedhjet e para, pastaj zgjedhjet e tjera do t’i kemi në fund të fundvitit”, tha ai./teve1.info/
