Zëdhënësi i Prokurorisë Themelore të Pejës Shkodran Nikçi, ka thënë se të dyshuarit për vrasjen e gruas së tij në Pejë, i është sekuestruar arma.
Ai tha se i njëjti është ndaluar për 48 orë, ndërsa Prokuroria brenda afatit ligjor do të parashtrojë parashtrojë kërkesë për caktimin e masës së paraburgimit.
“Me urdhër të prokurorit trupi i pajetë është dërguar në IML për obduksion, ndërkaq personi i dyshuar është në stacionin policor. I është sekuestruar arma. Aktualisht në vendin e ngjarjes janë duke u kryer disa ekzaminime dhe personi i dyshuar është ndaluar për 48 orë. Prokuroria brenda afatit ligjor do të parashtrojë kërkesë për caktimin e masës së paraburgimit në Departamentin e Krimeve të Rënda të Gjykatës Themelore të Pejës. Policia gjithashtu do të marrë autorizime shtesë për të kryer veprime hetimore…”, ka thënë ai.
Tutje, ai ka thënë se i njëjti ka pasur aktakuzë të ngritur nga Prokuroria edhe më parë për dhunë në familje.
I pyetur se a ka pasur personat tjerë prezent në momentin e kryerjes së krimit, ai tha se duhet të jemi të rezervuar në dhënien e këtyre informacioneve.
“Duhet të jemi të rezervuar në dhënien e këtyre informatave sepse mund të i dëmtojmë më shumë familjarët…Pasi të pranojmë raportin do të kuptojmë më shumë rreth shkaqeve, mënyrën se si është kryer kjo vepër penale e të gjitha veprimet tjera hetimore që do të bëjnë që Prokurori ta ngarkojë personin e dyshuar për veprën penale”, ka thënë ai.
