Prokuroria Speciale ka ngritur aktakuzë ndaj Faruk Mujkës, kryeshef ekzekutiv i ndërmarrjes “Ibër-Lepenci”.
Mujka dyshohet për “keqpërdorim të pozitës apo autoritetit zyrtar”, gjatë periudhës kur ka qenë nënkryetar i Komunës së Mitrovicës.
Mujka bashkë me drejtorin për gjeodezi, H.M. akuzohen se më 2021 i kanë shkaktuar dëm Agjencisë Kosovare për Privatizim rreth 125 mijë euro.
“Më 25.04.2021, të pandehurit, duke qenë në dijeni se Kuvendi i Komunës kishte marrë dy herë vendim për shpalljen me interes të posaçëm publik të një prone të paluajtshme, i paraqitën po këtij Kuvendi një Propozim-Vendim për këmbimin e të njëjtës prone, duke e paraqitur atë si pronë komunale, duke i shkaktuar dëm të konsiderueshëm prej 125,100.00 euro Agjencisë Kosovare të Privatizimit (AKP)”, thuhet në njoftimin e Prokurorisë Speciale.
Përveç kësaj akuze, Mujka akuzohet edhe për veprën penale “Mosraportimi ose raportimi i rremë i pasurisë, të ardhurave, dhuratave, dobisë tjetër materiale ose detyrimeve financiare”.
Ai është arrestuar në vitin 2023, ndërkohë që Policia e Kosovës kishte kryer bastisje me ç’rast kishte sekuestruar edhe 60 mijë euro. /teve1.info/
