Akuza dhe kundërakuza nga partitë politike në vend, vazhduan edhe të enjten.
Kjo pasi që as në tentativën e 41-të, Kuvendi nuk u konstitua.
Deputeti nga radhët e Lëvizjës Vetëvendosje, Nezir Kraki tha se partitë opozitare po e keqinterpretojnë aktgjykimin e Gjykatës Kushtetuese për mënyrën e votimit të fshehtë.
“Po konfirmohet keq-leximi dhe keq-interpretimi i aktgjykimit të fundit të Gjykatës Kushtetuese. Sjellja nuk ka ndryshuar përkundër ndryshimit që ne e kemi bërë në anën tonë dhe lëshimit, gatishmërisë që të lëshojmë pe me dy mundësi ose të shkojmë te votimi i komisionit dhe ta refuzojmë komisionin dhe ta rrëzojmë dhe pastaj të kalojmë në pako me zonjën Haxhiu së bashku me kryetarët e Kuvendit ose të votohet në mënyrë të fshehtë sepse sipas neve Gjykata Kushtetuese veç e ka konfirmuar atë. Dhe krejt ata që u bënë ekspertë të drejtës kushtetuese duhet ta dinë që kur një gjë thuhet në një vendim të formës së prerë nuk mund ta interpretosh në disa forma”, deklaroi Kraki.
Por të kundërtën thanë nga Partia Demokratike e Kosovës.
Kryetari i kësaj partie, Memli Krasniqi bëri të ditur se do të dorëzojnë një rast të ri në Gjykatën Kushtetuese lidhur me moskonstituimin e Kuvendit.
“Të tërhiqet nga qëndrimi i tij imponues, nga pengmarrja e shtetit dhe që të ndryshojë propozimin e tij dhe të kthehet në normalitetin e rrjedhës së seancës, ashtu siç ka kërkuar edhe aktgjykimi i Gjykatës Kushtetuese. Tri vazhdimet e fundit të seancës konstituive kanë qenë shkelje e qëllimshme dhe me vetëdije e Kushtetutës nga ana e kryesuesit të seancës me instruksione të partisë së tij dhe ne s’mund të qëndrojmë duarkryq, për këtë arsye sot gjatë ditës do ta dorëzojmë rastin e ri në gjykatë”, tha Krasniqi.
Edhe kryetari i LDK-së, Lumir Abdixhiku deklaroi se juristët e kësaj partie po përgatisin një lëndë për në Gjykatën Kushtetuese.
Ndërsa kryetari i Aleancës për Ardhmërinë e Kosovës, Ramush Haradinaj tha se kryeministri në detyrë, Albin Kurti “ka vendosur që as brenda 30 ditëve të mos e formojë shumicën parlamentare”.
“Me 61 vota e zgjedhim kryetarin, nëse nuk i bën ai na i harxhon këto 30 ditë pra na mban peng. Është mirë ose me e bë shumicën, 61 votë ose me lëshu rrugë, pra të mos na i harxhojë këto 30 ditë pa konstituim të Kuvendit, sepse pasojat janë të mëdha. Mirëpo po shihet se ai e ka vendosur që t’i harxhojë këto 30 ditë pa e bë shumicën, se krijon shumicën parlamentare dhe pa e zgjedh kryetarin e Kuvendit”, tha Haradinaj.
Tentativa e radhës për konstituim të Kuvendit është thirrur për të shtunën në ora 11:00.
