Kanë mbetur më pak se dhjetë ditë deri në skadimin e mandatit të guvernatorit aktual të Bankës Qendrore të Kosovës, Fehmi Mehmeti dhe ende nuk dihet se kush dhe kur do të emërohet guvernatori ri i Bankës Qendrore të Kosovës.
Procesi i përzgjedhjes së guvernatorit ka ngecur në Komisionin parlamentar për Buxhet, Punë dhe Transfere.
Mirëpo, për këtë, kryetari i Komisionit për Buxhet nga radhët e Vetëvendosjes, Armend Muja nuk ka pranuar të flas.
Ndërsa, anëtari i PDK-së, në këtë komision, Mërgim Lushtaku, e ka kritikuar mazhorancën dhe ka kërkuar përshpejtim të procedurës së përzgjedhjes.
Deputeti nga radhët e PDK-së, Lushtaku dyshon se kjo vonesë mund të jetë e qëllimshme, pasi sipas tij në këtë proces ka edhe ndikim partia në pushtet.
Mes tjerash, ai kërkon nga kryetari i Komisionit për Buxhet, Punë dhe Transfere, Armend Muja, t’i ftojë anëtarët në komision dhe të fillojnë me shqyrtimin e procedurave, pasi që mandati i guvernatorit aktual përfundon më 29 mars.
“Tashmë e dimë që me 29 do t’i skadojë edhe mandati guvernatorit dhe sigurisht në këtë pjesë është një papërgjegjësi e madhe dhe institucionale në këtë drejtim, sepse e dimë çfarë krizash ekonomike po ballafaqohet jo vetëm Kosova, por e gjithë bota, dhe është shumë e rëndësishme që të kemi një stabilitet edhe financiar dhe bankar që duhet të garantojë edhe BQK në këtë drejtim”, ka thënë Lushtaku.
Deputeti Lushtaku thotë po ashtu se e vetmja zgjidhje pas datës 29 mars është që BQK të ketë një ushtrues detyre. E që sipas tij, kjo është e qëllimshme nga ana e anëtarëve të BQK-së dhe mazhorancës.
“Në bazë të procedurave ligjore shohim se e vetmja zgjedhje do të jetë edhe vet mundësia që të ketë një ushtrues detyre të guvernatorit. Dhe me sa duket ky është edhe qëllimi i vet anëtarëve të BQK-së, ndoshta edhe mazhorancës, sepse e dimë shumë mirë që Nurboja ka qenë edhe kandidat për deputet në VV dhe si i tillë realisht është ndikuar drejtpërdrejt edhe nga mazhoranca. Për herë të parë drejtpërdrejt anëtarët e bordit të BQK-së janë të lidhur ngushtë me pushtetin dhe kjo është një pasiguri tjetër edhe juridike, financiare, por edhe për vet BQK-në si institucion dhe si kushtetues”, ka deklaruar Lustaku, derisa i i ka bërë thirrje shumicës së kuvendit që, siç ka thënë ai, të mos luajnë me fatin e Kosovës pasi ka shtuar se njëri ndër institucionet më të rëndësishme është BQK.
Mirëpo, sa i përket kandidatëve për këtë pozitë në BQK, Lushtaku ka thënë se vet lista lë shumë për të dëshiruar.
“Kemi pritur shumë që një listë që e kanë prezantuar do të jetë me njerëz me kuadrat dhe cilësi të dëshmuar në institucionet publike dhe ndërkombëtare. Fatkeqësisht në këtë drejtim nuk kemi pasur një listë e cila garanton sigurinë financiare të bankave në Kosovë dhe të sigurimeve në përgjithësi, sigurisht edhe vet çështjeve makriofinanciare në Kosovë”, shtoi Lushtaku.
Sipas Lushtakut, ka padrejtësi në përzgjedhjen e kandidatëve për guvernator.
Fehmi Mehmeti ushtron funksionin e Guvernatorit të BQK-së nga data 29 mars 2018, ndërsa ky mandat skadon më 29 mars 2023.
Ndërsa, në fund të muajit të kaluar, Komisioni për Buxhet, Punë dhe Transfere, ka shqyrtuar listën e kandidatëve për pozitën e Guvernatorit të Bankës Qendrore të Kosovës (BQK). Me këtë rast, katër kandidatë sipas Bordit janë në garë për t’u zgjedhur në krye të BQK-së.
Kandidatë për këtë pozitë janë; Ahmet Ismaili, Nexhat Kryeziu, Lulzim Ismajli dhe Shkëndije Himaj.
Në listën që është dërguar nga Paneli i BQK-së, deputetët e partive opozitare kanë pasur kritika sa i përket mënyrës sesi ka shkuar procesi i përzgjedhjes së Guvernatorit. /KP/
