Për ngacmimet që kishte bërë, të mërkurën u vu në pranga.
Një punonjës i Policisë së Kosovës, staf civil, u arrestua një ditë më parë pasi po dyshohet se për dy javë rresht kishte ngacmuar seksualisht një të mitur.
Ai dyshohet se ngacmimet i bëri në afërsi të shkollës ku vajza ndjek mësimet.
E të tilla raste, ishin raportuar pesë gjatë vitit të kaluar.
“Inspektorati Policor i Kosovës ju njofton se lidhur me veprën penale ngacmim seksual gjatë vitit 2024 janë trajtuar/iniciuar pesë raste lidhur me të cilat janë arrestuar dy të dyshuar, dy janë suspenduar kurse një është transferuar. Të dyshuarit kanë qenë të gjithë të gjinisë mashkullore”, thuhet nga IPK.
Ish-kryeshefi i IPK-së thotë se punonjësit e Policisë nuk janë imunë ndaj hetimeve dhe ndjekjeve penale, andaj kërkon një fokus më të madh ndaj kësaj dukurie.
“Si për çdo qytetarë tjetër, edhe për zyrtarët policorë duhet të ketë një procedurë transparente, të bazuar në prova të qarta të ndërlidhura me njëra-tjetrën e që në fund duhet të ketë epilog të qartë dhe po ashtu duhet të kemi parasysh se prezumimin e pafajësisë dhe çdo qytetar apo zyrtar policor është i pafajshëm përderisa nuk argumentohet e kundërta nga organet ligjzbatuese”, thotë Hoxha.
Kurse nënkoloneli në pension, Refki Morina thotë se persona të tillë nuk kanë vend në Policinë e Kosovës.
“Uniforma nuk e lejon një gjë të tillë për arsye se kemi të bëjmë me prestigjin, imunitetin dhe përvojën e besueshmërinë e qytetarëve ndaj Policisë. Andaj forma të tilla duhet të mos tolerohen as nga Inspektorati, as nga Menaxhmenti i Policisë dhe persona të tillë ta marrin dënimin e merituar e të largohen nga Policia për arsye se persona të tillë nuk kanë vend në Policinë e Kosovës, e zbehin imunitetin dhe përqendrueshmërinë e qytetarëve”, shprehet Morina.
Ndaj zyrtarit në fjalë, Prokuroria Themelore në Prizren ka caktuar masën e ndalimit prej 48-orësh.
