Kandidati i Lëvizjes Vetëvendosje për kryeministër, Albin Kurti, ka vlerësuar se Deçani ka përfituar investime të konsiderueshme gjatë periudhës së qeverisjes së tij, duke theksuar se projektet e realizuara kanë ndikuar në përmirësimin e infrastrukturës dhe shërbimeve për qytetarët.
Kurti ka bërë të ditur se në këtë komunë janë investuar më shumë se 60 milionë euro në sektorë të ndryshëm, përfshirë arsimin, infrastrukturën rrugore, bujqësinë, trashëgiminë kulturore, si dhe aktivitetet për të rinjtë dhe sportin.
Ai ka paralajmëruar se, nëse fiton mandatin e ardhshëm, fokusi do të vazhdojë të jetë në realizimin e projekteve të reja zhvillimore.
Sipas tij, ndër prioritetet kryesore janë ndërtimi i sistemit të ujësjellësit në Strellc të Epërm dhe Strellc të Ulët, impianti për trajtimin e ujërave të zeza në zonën e Lumbardhit dhe Gramaqelit, si dhe krijimi i hapësirave të reja për kujdesin ndaj fëmijëve në Isniq dhe Strellc.
Po ashtu, Kurti ka përmendur edhe zgjerimin e akseve rrugore Deçan–Pejë dhe Deçan–Gjakovë, projekte që sipas tij do të ndikojnë në përmirësimin e qarkullimit dhe lidhjeve ndërmjet komunave.
“Gjatë qeverisjes sonë mbi 60 milionë euro investime janë sjellë në Deçan për ndërtime e renovime, për shkolla e rrugë, bujqësi, trashëgimi kulturore, rini dhe sport. Mbështetjen do ta shtojmë. Mandatin e ardhshëm vazhdojmë mes tjerash me ujësjellësin në Strellc të Epërm e Strellc të Ulët, impiantin e ujërave të zeza në Lumbardh e Gramaqel, çerdhe për fëmijë në Isniq e Strellc brenda shkollave, si dhe zgjerim të rrugës magjistrale Deçan–Pejë prej 7.6 kilometra dhe Deçan–Gjakovë prej 15 kilometra”, ka shkruar Kurti.
