15 mijë banorët e fshatrave Lismir, Bardh i Madh, Grabovc dhe Sllatinë të komunës së Fushë-Kosovës nga sot do të furnizohen më ujë të pijes.
I pari që e piu ujin nga kroi në fshatin Lismir të Fushë-Kosovës ishte kryeministri në detyrë, Albin Kurti, i cili tha se një padrejtësi që ka zgjatë për çerek shekulli po rregullohet.
Kurti tha se nga ky projekt me vlerë 3.7 milionë euro do të furnizohen me ujë 15 mijë banorët e Fushë-Kosovës.
“Kjo është një ditë e gëzueshme për të gjithë neve dhe një padrejtësi që ka zgjatë për çerek shekulli po rregullohet sot duke sjellur ujë për fshatin Lismir, një e drejtë themelore njerëzore e cila do të mundësoj që jeta të jetë më e dinjitetshme por në të njëjtën kohe edhe tregon vëmendjen, përkushtimin tonë si dhe mbajtjen e zotimeve tona. Tash Valon Prebreza, i cili është kandidati ynë për kryetar komune, pa qenë kryetar komune shiheni çka ka bërë, kur bëhet kryetar komune kushedi sa të mbarë dhe mirat do t’i sjellë për komunën e Fushë-Kosovës”, tha ai.
Kryeshefi i Kompanisë Regjionale të Ujësjellësit “Prishtina”, Arsim Fetahu ka garantuar cilësi dhe furnizim të rregullt me ujë të pijes për këto fshatra.
“Duke iu garantuar që cilësia e ujit të këtij projekti që përurojmë është nga më të mirat në vendin tonë, por edhe në rajon dhe më gjerë. Kur e them këtë e kam parasysh që uji që rrjedh momentalisht në krojet e juaja vjen nga Liqeni i Ujmanit, trajtohet në fabrikën në Shkabaj, e cila ka teknologjinë më moderne në rajon dhe iu siguroj që do të keni cilësi por edhe furnizim të rregullt”, tha ai.
Kandidati i Lëvizjes Vetëvendosje për kryetar të komunës së Fushë-Kosovës, Valon Prebreza gjatë përurimit në fshatin Lismir, tha se banorët e këtij fshati por edhe të fshatrave tjera pas 25 vitesh do të kenë tash e tutje ujë të pijes.
“Në dhjetor të vitit 2023 kur kemi filluar punimet në fshatin Bardh pyetja juaj ka qenë pse nuk është i përfshirë Lismiri, jemi sot këtu me përuruar këtë projekt para Bardhit me ndihmën financiare që ka bërë Ministria e Ekonomisë në vlerën prej 424 mijë euro, i cili do të furnizoj 672 banorë të këtij fshati të cilët nuk kanë pas ujë që 25 viteve”, tha ai.
Pas fshatit Lismir përurimit i ujit u bë edhe në fshatin Bardh i Madh si dhe në Sllatinë.
