Bashkësia Islame e Kosovës ka marrë vendim që strukturat dhe institucionet e saj të stolisen me flamurin e Ushtrisë Çlirimtare të Kosovës.
Sipas vendimit, flamuri i UÇK-së do të vendoset edhe në minaret e xhamive, përveç hapësirave të tjera të përcaktuara për vendosjen e flamujve.
Vendimi është marrë nga Kryesia e BIK-ut, nën udhëheqjen e kryetarit Naim Tërnava, pas mbledhjes së saj.
Ndërkohë, Xhamia e Shajkocit ka publikuar në rrjetin social Facebook një video, ku shihet se flamuri i UÇK-së tashmë është vendosur në hapësirat e xhamisë.
Në njoftimin e publikuar bashkë me videon thuhet:
“Nesër, në Hagë, gjykohen njerëz që përfaqësojnë një nga kapitujt më të dhimbshëm dhe më të rëndësishëm të historisë së Kosovës. Ata që dolën në luftë për lirinë e vendit dhe për të ardhmen e popullit tonë meritojnë drejtësi dhe respekt. Sot e vendosëm flamurin e UÇK-së si shenjë nderimi për të gjithë ata që sakrifikuan për lirinë e Kosovës. Liria nuk harrohet, sakrifica nuk harrohet dhe drejtësia është ajo që kërkojmë.Zoti i shpërbleftë dëshmorët dhe u dhëntë forcë familjeve të tyre”, thuhet në njoftimin e xhamisë së fshatit Shajkoc.
