Që nga sot, çmimi i biletës në autobusët e Trafikut Urban do të jetë 50 cent, 10 cent më shumë nga sa ishte deri dje.
Kjo pas vendimit të Komunës së Prishtinës për ta ndryshuar atë, përcjell teve1.info
Sipas njoftimit, duke filluar nga e marta, për të gjithë përdoruesit e rregullt, çmimi i biletës mujore nga 14.00 euro do të zbresë në 13.50 euro.
“Në anën tjetër, për t’iu përshtatur nevojave të të gjithë qytetarëve, kemi përfshirë në planin tarifor biletat javore dhe ditore shumëpërdorimëshe: Bileta Ditore përfshin udhëtime vajtje-ardhje pa limit përgjatë 24 orëve, me çmimin 0.80€. Bileta Javore përfshin udhëtime vajtje-ardhje pa limit në të gjitha ditët e javës, me çmimin 4.00€”, thuhet në njoftim.
Kartelat javore dhe mujore mund të blihen në pikat e shitjes së Trafikut Urban: Kioska me logon e Trafiku Urban, prapa Objektit të Komunës së Vjetër (tek “Plepat”), dhe Kioska me logon e Trafiku Urban, në lagjen Kodra e Diellit, tek “Banesat e Bardha”.
Në njoftim theksohet se kjo është bërë nga Komuna e Prishtinës në kuadër të Marrëveshjes së Kredisë mes Trafiku Urban Prishtinë dhe Bankës Evropiane për Rindërtim dhe Zhvillim (BERZh), me qëllim të përmirësimit të shërbimit të transportit publik. /Teve1.info/
