Gjykata Themelore në Prishtinë u ka caktuar masën e paraburgimit prej 30 ditëve tre të dyshuarve: Andi Pajaziti, Hisni Gecaj dhe Gëzim Zakuti, që u përfshinë në rastin e së premtes në “Bon Vivant” ku u vra një qytetar dhe u plagosën disa të tjerë, raporton teve1.info
Lajmin për teve1.info e konfirmoi zëdhënësja e Gjykatës Themelore në Prishtinë, Mirlinda Gashi.
Lidhur me këtë rast në arrati ndodhet edhe i dyshuari tjetër, Dukagjin Nikollaj.
Prokuroria Themelore në Prishtinë, të shtunën ka njoftuar se të gjithë të dyshuarit për përfshirje në rastin “Bon Vivant”, kanë të kaluar kriminale.
Lidhur me rastin e 4 gushtit, Shërbimi Spitalor Klinik dhe Universitar i Kosovës njoftoi të shtunën se 17 persona janë lënduar, kurse njëri prej tyre vdiq si pasojë e plagëve të marra. Rasti dyshohet se ndodhi si pasojë e një mosmarrëveshjeje mes të dyshuarve.
Policia e Kosovës e ka konfirmuar të premten pas mesnate se në incidentin që ka ndodhur në një lokal në qendër të Prishtinës ka persona të plagosur me armë zjarri, por edhe nga copat e xhamave.
