E Lidhja Demokratike e Kosovës po pret nga Trump që të implementohet marrëveshja e Uashingtonit e nënshkruar në vitin 2020 mes Kosovës e Serbisë.
Ishte cilësuar si një ndër marrëveshjet historike që kishte ndodhur mes Kosovës e Serbisë.
Më 4 shtator të vitit 2020, ish-kryeministri Avdullah Hoti bashkë me presidentin serb, Vuçiq nënshkruan marrëveshje për normalizimin e marrëdhënieve.
Përmes kësaj ujdie, Kosova përfitonte në aspektin ekonomik e po ashtu edhe njohje nga shteti i Izraelit.
E me triumfin e Donald Trump në zgjedhjet për president të SHBA-së, Lidhja Demokratike e Kosovës pret që të ketë progres në implementimin e kësaj marrëveshje.
Nënkryetari, Lutfi Haziri shprehet se kryeministri Kurti e ka injoruar këtë marrëveshje bashkë me presidentin Vuçiq.
“Qeveria Kurti e ka mënjanu e ka skeju dhe nuk e ka trajtuar këtë marrëveshje përkundër disa deklaratave të eksponentëve të Lëvizjes Vetëvendosje kundrejt kësaj marrëveshje. Besohet shumë që me vetë faktin që presidenti Biden e pati konfirmu këtë marrëveshje dhe e pati lënë në fuqi në Shtëpinë e Bardhë por i është rikthyer koordinimit me evropianë”, ka deklaruar ai.
Ai pret se do të ketë një fuqizim më të madh nga Trump në procesin e dialogut mes Kosovës dhe Serbisë.
“Gjatë këtyre katër viteve në administrimin e dialogut qeveria amerikane ka koordinuar veprimet me BE-në dhe ka lehtësuar raportin duke marrë anë kah Kosova dhe me Kosovën. Por tani do të zbardhet krejt ky pozicion dhe rol amerikan në formatin e dialogut, fillimisht duhet me pritë kush do të jetë sekretar i shtetit, kush do të jetë zv.kryetar, sekretar i shtetit e kush do të jetë i ngarkuar për Evropë”, ka thënë ai.
Edhe ish-diplomati kosovar, Albert Prenkaj vlerëson se Qeveria Kurti nuk ka treguar përkushtim dhe zell për implementimin e kësaj marrëveshje.
“Besoj që një Qeveri e re e cila do të dalë nga zgjedhjet e shkurtit 2025 dhe me përkushtimin e administratës Trump 2 do të jenë në fokus të implementimit. Kjo marrëveshje dhe të gjitha ato të cilat janë paraparë në këtë kuadër janë futur edhe në kuadër të procesit të Berlinit”,ka pohuar ai.
Tëvë1 ka kërkuar një qëndrim për këtë edhe nga Qeveria e Kosovës, mirëpo gjatë ditës nga Zyra e Kryeministrit nuk kanë kthyer përgjigje.
