Kosova i është “rikthyer” paqëndrueshmërisë politike dhe institucional, duke prodhuar kriza të reja e të njëpasnjëshme.
Pas zgjedhjeve të dhjetorit të vitit të kaluar, qytetarët e Kosovës do të dalin përsëri në zgjedhje më së largu në fillim të qershorit pasi legjislatura e dhjetë e Kuvendit nuk arriti ta zgjedh presidentin.
Vendi është përballur vazhdimisht me kriza politike ku asnjë qeveri nga shpallja e pavarësisë nuk kishte arritur ta përfundojë mandatin e plotë 4-vjeçar, përjashto Qeverinë Kurti II, 2020-2024.
Por, pas këtij mandati vendi u përball me krizë në formimin e institucioneve.
Pas zgjedhjeve të 9 shkurtit të vitit të kaluar, ku Lëvizja Vetëvendosje doli e para, por nuk arriti të formojë vet institucionet, pas muajsh përpjekje për konstituim të Kuvendit, dështoi formimi i Qeverisë.
Vendi shkoi në zgjedhje në dhjetor të vitit 2025, ku LVV arriti të marrë shumicën e nevojshme për ta formuar e vetme Qeverinë.
Por, kriza u shfaq në zgjedhjen e Presidentit pas skadimit të mandatit të Vjosa Osmanit më 5 mars.
Edhe për çështjen e të parit të vendit u provua të arrihet marrëveshje, por që nuk sollën ndonjë rezultat.
LVV dhe partitë opozitare, PDK e LDK që ishin të përfshira në bisedime, kanë akuzuar njëra tjetrën për mosgatishmëri për marrëveshje.
Kuvendi është shpërndarë mbrëmë, pasi në afatin e fundit nuk u votua presidenti. Vetëm të martën janë mbajtur tri seanca e fundit në ora 23:00, por vetëm deputet e shumicës ishin në sallë.
Në legjislaturën e dhjetë, VV-ja kishte 57 deputetë, PDK-ja 22, LDK-ja 15 dhe AAK-ja 6. 20 ulëset e tjera ishin të komuniteteve./teve1.info/
