Kurtish Hoxhaj nga shoqata “Bereqeti” ka thënë se për familjet të cilat kanë nevojë për mbështetje janë aktiv si në ditë të zakonshme ashtu edhe gjatë festave.
Hoxhaj ka treguar se me rastin e festës së Kurban Bajramit, të enjten kanë dhuruar një banesë për një familje shtatë anëtarëshe në Gjakovë, ndërsa shumë shpejt do të strehojnë edhe dy familje tjera atje.
Ai po ashtu ka njoftuar se edhe në Prizren është gati një shtëpi për një rast social por që sipas tij për çështje teknike nuk është bërë dhurimi i çelsave akoma.
“Si “Bereqet” jemi çdo ditë të Zotit aktiv edhe jashë festës, por edhe gjatë festave për me iu siguru mbështetje familjeve që kanë nevojë. Për shembull, ne vetëm ditën e djeshme në Gjakovë kemi dhuruar çelsat e një banese për një familje shtatë anëtarëshe në një afat shumë rekord, le të themi ndoshta as dy javë ditë janë mbledhur mjete dhe është blerë. Shumë shpejt do të startojmë edhe me strehimin e dy familjeve tjera, po flasim për Gjakovë. Pastaj, ne për çështje teknike, nuk kemi mundur të arrijmë t’i dhurojmë çelsat edhe pse është gati një shtëpi në Prizren për një familje rast social, që komuna e ka bërë ndërtimin e vrazhdë e shoqata “Bereqeti” e ka marrë përsipër mbulimin e shpenzimeve tjera”, ka bërë të ditur ai në emisionin “Mesditë” në Tëvë1 .
Tutje, Hoxhaj, ka theksuar se “Bereqeti” gjatë këtryre ditëve edhe në qytetin e Bajram Currit në Shqipëri ka dërguar një kontigjent me veshmbathje të reja dhe paisje shtëpiake.
“Tash për festën e Bajramit kemi dërguar edhe një kontigjent në Shqipëri, në qytetin e Bajram Currit me veshmbathje dhe paisje shtëpiake prej shoqatës “Bereqeti”, po flasim për veshmbathje të reja të cilat bamirësit po i dhurojnë donacionet e tyre në shoqatën tonë. Pastaj, këto ditë para festës së Kurban Bajramit është furnizuar me 2 ton mish edhe kuzhina qendrore e Prishtinës, në bashkëpunim me shoqatën “ Bereqeti”, pastaj kemi që në të gjitha komunat janë shpërndarë ndoshta me qindra pako me veshmbathje, mish e rroba të reja për familjet që kanë nevojë”, ka thënë Hoxhaj.
