Nga Llausha në Prekaz vinte shpesh gjatë luftës.
E ish-bashkëluftëtarin e komandantin e tij, nuk e harroi as në ditët e lirisë.
Kështu, ish-eprori i UÇK-së, Xhevahir Geci, ditën e martë e nisi me homazhe te varri i komandantit legjendar, Adem Jashari.
Krejt kjo në ditën kur pritet të betohej si deputet i ri në Kuvendin e Kosovës.
“Inspirimi im më i madh është fuqizimi im shpirtëror kur të vije në Prekaz, edhe sa ka qenë komandanti ynë legjendar gjallë dhe çdo kontakt më të, ndejë apo plan më të, ka qenë inspirim apo fuqizim shpirtëror”, është shprehur Geci për Tëvë1.
Nga Prekazi, Geci u nis drejt shtëpisë në Llaushë.
As këtu, nuk mungoi fotografia e ish-komandantit të tij.
Xhevahir Gecit, s’ka si mos t’i kujtohet edhe aksionin i parë kundër forcave serbe, në në vitin 1992.
“Me një grup djemve të Llaushës, djem të rinj, atëkohë kemi qenë diku 22-24 vjeçar, me urdhër të komandantit Adem Jashari, që forcat serbe nuk duhet të ndihen rehat nëpër asnjë qytet të Kosovës, sepse ata kanë robërues, forcë pushtuese”, tregon deputeti i zgjedhur.
Ish-ushtaraku do të jetë deputet në legjislaturën e 9-të të Kuvendit të Kosovës.
Kjo meqë mori afër 22 mijë vota në garën për deputet në zgjedhjet parlamentare të 9 shkurtit.
“Ky betimi i sotit do të jetë formal dhe me kënaqësinë më të madhe do të jem pjesë e asaj ceremonie”, u shpreh Geci.
E familja thonë se në rrugëtimin e ri, e kanë më të lehtë ta përkrahin.
“Si gjithmonë (do ta përkrahi). Por, tashmë edhe më lehtë, sepse atëherë e kam nis për luftë, tash në liri më lehtë, më mirë, gjithmonë krenare”, thotë Meleqe Geci, bashkëshortja e Xhevair Gecit.
Pavarësisht që ishte i pranishëm në seancën për konstituimin e Kuvendit të Kosovës, betimi nuk ndodhi të martën.
Kjo meqë seanca u shty për një ditë tjetër, pasi s’u miratua raporti i Komisionit për verifikimin e mandateve.
