Paneli i Apelit të Dhomave të Specializuara i ka ulë dënimin Salih Mustafës, ish komandant Calit, nga 26 në 22 vite, raporton teve1.info
Ish komandanti i UÇK-së, Salih Mustafa, mori vendimin e Apelit për dënimin e tij nga shkalla e parë e gjyqësorit në Hagë, me 26 vite burgim. Paneli i apelit, numëroi kundërshtitë e mbrojtjes së Mustafës, që u rrëzuan pasi që nuk ishin të argumentuara.
Mirëpo, apeli uli dënimin e njësuar nga 26 në 22 vite burgim, pasi zvogëloi dënimet për akuzat veç e veç.
Sipas vendimit tw paraqitur nga Dhomat e Specializuara në Hagë, Paneli i Apelit la në fuqi verdiktet e fajësisë së Mustafës për krimet e luftës të ndalimit arbitrar (Pika 1 e Aktakuzës), torturës (Pika 3 e Aktakuzës) dhe vrasjes së paligjshme (Pika 4 e Aktakuzës).
“Apeli i z. Mustafa përmbante nëntë pika të ndara në 51 nënpika. Paneli i Apelit rrëzoi tetë pika të paraqitura nga z. Mustafa që kundërshtonin Aktgjykimin e Trupit Gjykues, ndërsa miratoi pjesërisht kundërshtimin e tij ndaj dënimit me 26 vjet burgim nga Trupi Gjykues për tri pikat e Aktakuzës që ishte shpallur fajtor. Ndonëse plotësisht i vetëdijshëm për diskrecionin e gjerë të Trupit Gjykues në dhënien e dënimit, dhe duke pasur parasysh se dënimet nuk mund të “zhvendosen” lehtë nga një çështje gjyqësore në tjetrën, gjithsesi Paneli i Apelit konstatoi se në çështjet e gjykuara si në tribunalë penalë dhe në gjykatat e Kosovës lidhur me krime lufte të krahasueshme me ato për të cilat u dënua z. Mustafa, dënimet e dhëna ishin më të shkurtra se dënimi i z. Mustafa nga Trupi Gjykues. Rrjedhimisht, Paneli i Apelit zvogëloi dënimet individuale të dhëna zotit Mustafa për krimet e luftës që ishte shpallur fajtor dhe zvogëloi dënimin e njësuar nga 26 në 22 vjet burgim, duke llogaritur kohën e kaluar në paraburgim”, thuhet në vendim.
Sipas tij, Paneli i Gjykatës së Apelit theksoi se Aktgjykimi “është një hap i rëndësishëm drejt vendosjes së drejtësisë për viktimat dhe llogaridhënies,” dhe se zvogëlimi i dënimit të Mustafës “nuk sugjeron aspak se krimet për të cilat ai është shpallur fajtor dhe dënuar, nuk janë të rënda”.
“Paneli i Apeli vuri në dukje se z. Mustafa nuk apeloi Urdhrin për Zhdëmtim të lëshuar nga Trupi Gjykues, në të cilin tetë viktimave pjesëmarrëse në proces iu akorduan dëmshpërblime, dhe se vendimi i këtij paneli nuk ndikon në Urdhrin për Zhdëmtim. Gjithashtu, Paneli i Apelit theksoi se la në fuqi verdiktin e fajësisë të z. Mustafa për të cilin u konstatua se ai mbante “përgjegjësi penale individuale” për krimet e luftës të torturës, ndalimit arbitrar dhe vrasjes së paligjshme dhe se “as UÇK-ja, as populli i Kosovës nuk ishin objekt i këtij procesi gjyqësor dhe nuk mbahen përgjegjës apo fajtorë për këto krime”, thuhet tutje në vendim.
Përmbledhja e Aktgjykimit të Apelit gjendet në faqen e internetit të DHSK-së.
“Salih Mustafa u arrestua dhe u dërgua në objektin e paraburgimit të Dhomave të Specializuara të Kosovës më 24 shtator 2020. Aktgjykimi i Trupit Gjykues u shqiptua më 16 dhjetor 2022 dhe Urdhri për Zhdëmtim më 6 prill 2023.
