Anulohen seancat e parapara të mbahen nga 12 deri 15 shkurti 2024, në gjykimin ndaj Hashim Thaçit, Kadri Veselit, Jakup Krasniqit dhe Rexhep Selimit.
Anulimi i këtyre seancave është bërë pas kërkesës së mbrojtjes së Kadri Veselit, me arsyen se me vdekjen e avokatit Andrew Strong, dhe rekrutimin e avokatit të ri, këtij të fundit i duhet kohë për tu familjarizuar me këtë proces, raporton “Betimi për Drejtësi”.
Edhe pse mbrojtja e Vesilit në kërkesën e saj bërë trupit gjykues kishte kërkuar që seancat e planifikuar për 29 deri 31 janar, 1 shkurt dhe 12 deri15 shkurt 2024 të anulohen, Trupi Gjykues këtë kërkese e miratoi pjesërisht, duke aprovuar anulimin vetëm të seancave të mesit të shkurtit.
Në vendimin e Trupit Gjykues të nënshkruar nga kryetari i këtij trupi, Charles Smith III, thuhet se mbrojtja ka treguar një arsye të vlefshme për një ndryshim të kufizuar të orarit për të garantuar që mundësia e Mbrojtjes për t’u përgatitur për marrjen në pyetje të dëshmitarëve të ardhshëm të mos ndikohet nga vdekja e papritur e bashkëmbrojtësit të saj si dhe rekrutimi i mëpasshëm i zëvendësuesit të tij.
Kërkesën e mbrojtjes së Kadri Veselit e kishin përkrahur avokatët mbrojtës të Thaçit, Krasniqit dhe Selimit dhe Avokati i Viktimave, ndërsa Prokuroria nuk pati qëndrim lidhur me këtë kërkesë.
Ndryshe, më 11 dhjetor 2023, opinioni publik ishte njoftuar për vdekjen e avokati amerikan Andrew Strong, i cili ishte në ekipin e mbrojtjes së ish-kryeparlamentarit të Kosovës, Kadri Veselit.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020./BetimipërDrejtësi