Gjykata Kushtetuese e Kosovës ka zgjidhur çështje dhe vendosur standarde të rëndësishme në forcimin e demokracisë e shtetit të së drejtës, ligjit e mbrojtjes së të drejtave të njeriut duke afirmuar vlerat e parimet kushtetuese pas gati 16 vjet të funksionimit të saj.
Kështu u tha sonte në ceremoninë solemne të pranim-dorëzimit të detyrës nga kryetarja e deritanishme e Gjykatës Kushtetuese Gresa Caka-Nimani te kryetari i zgjedhur Nexhmi Rexhepi.
Në këtë ceremoni morën pjesë përfaqësues të lartë të institucioneve shtetërore, të sistemit gjyqësor e prokurorial, përfaqësues të misioneve diplomatike në vend, organizatave vendore dhe të huaja, të akademisë dhe shoqërisë civile.
Gresa Caka- Nimani derisa ka uruar kryetarin e përzgjedhur për pozitën, ka thënë se i njëjti do të merr barrën e drejtimit të këtij institucioni në ballafaqimet me sfidat dhe shënimin e arritjeve të reja.
“Sot i dorëzohet detyra një gjenerate të re, kryetarit të ri të Gjykatës që do të merr barrën e drejtimit të këtij institucioni në ballafaqimet me sfidat dhe shënimin e arritjeve të reja. Ky tranzicion që kalon nëpër të kaluarën, të tashmen dhe orientohet nga e ardhmja nuk duhet assesi të nënkuptohet në lidhje me individin, por me fazat zhvillimore dhe ciklin jetësor të institucionit… Gjykata ka ndërtuar një kulturë organizative dhe traditë vendimmarrëse që nuk ndërlidhet me plotësimin e pritjeve momentale të asnjë pale e as opinionit publik, por me zhvillimin e drejtësisë kushtetuese, me zhvillimin e shtetit të së drejtës. Me idenë parësore që të qëndruarit besnik Kushtetutës dhe avancimit të reputacionit të Gjykatës të shtrirë në kohë, përfshirë në forume ndërkombëtare të drejtësisë kushtetuese duke i shërbyer kështu paraqitjes me dinjitet dhe përforcimit të identitetit e reputacionit të Republikës së Kosovës. Me besimin e plotë dhe pasionin e pashtershëm për të mbrojtur dhe lartësuar një Kushtetutë që simbolizon shtetin sovran”, ka thënë Cakaj.
Ndërsa është shprehur mirënjohëse që ka pasur mundësinë të adresojë sfidat e kësaj gjykatë për vite, Caka-Nimani ka thënë se mbrojtja e Kushtetutës është akti më i lartë i patriotizmit të çdo qytetari të Republikës sonë.
“Fakti që janë bërë 16 vjet nga miratimi i kësaj Kushtetute e që të gjithë ne shpesh rrëmbehemi nga dinamikat ditore nuk e pakëson simbolin që ngërthen Kushtetuta e Republikës së Kosovës. Ajo nuk është thjesht një akt formal normativ, një dokument, por është një akt që brohoritjet e lumenjve me njerëz nëpër rrugët e Kosovës përgjatë viteve 80′ dhe 90′ për liri, pavarësi, demokraci, i ka shndërruar në realitet. Është kjo Kushtetutë që simbolizon lirinë, pavarësinë dhe demokracinë tonë, është kjo Kushtetutë, shkronjat e së cilës shpërblejnë sakrificën e së kaluarës me aspiratat dhe shpresat e të ardhmes… Mbrojtja e kësaj kushtetute nuk është thjesht detyrë, mbrojtja e kësaj Kushtetute është akti më i lartë i patriotizmit të çdo qytetari të Republikës, shërbyesi publik, funksionari të lartë publik, e posaçërisht i gjyqtarëve të Gjykatës Kushtetuese të Republikës së Kosovës”, tha Caka-Nimani.
Ndërsa, kryetari i zgjedhur Nexhmi Rexhepi u zotua se do t’i qëndrojë besnik kësaj detyre duke mbrojtur dhe ruajtur supremacinë e Kushtetutës.
“Ashtu sikurse ka evoluar Republika duke fituar fuqi vit pas viti, po ashtu kjo gjykatë është maturuar dhe forcuar në autoritet dhe prestigj. Vërtet, në Gjykatën Kushtetuese të Republikës së Kosovës nuk hyhet duke kaluar mes figurave gjigante prej mermeri, dhe as nuk ka një para-kulm që mbahet nga shtylla masive të veshura me mermer, por jam i lumtur që mund të them se pas gati 16 vjet të funksionimit të saj, Gjykata Kushtetuese ka zgjidhur çështje dhe ka vendosur standarde të rëndësishme në forcimin e demokracisë e shtetit të së drejtës, sundimit të ligjit e mbrojtjes së të drejtave të njeriut duke afirmuar vlerat e parimet kushtetuese…Besimi i publikut në rendin juridik dhe në sistemin e drejtësisë është shenjë dalluese e çdo qytetërimi të zhvilluar. Ne jemi shumë të lumtur për besimin publik që Gjykata Kushtetuese gëzon. Për ne nevoja për të pasur besim publik assesi nuk nënkuptoj nevojën për popullaritet. Ne besojmë në atë që është thënë se mungesa e besimit në gjyqësi është fillimi i fundit të një shoqërie. Roli dhe detyra e Gjykatës Kushtetuese është të mbrojë dhe të ruajë supremacinë e Kushtetutës”, tha ai.
Kujtojmë, gjyqtarja Caka-Nimani mori detyrën e kryetares së Gjykatës Kushtetuese në qershor 2021. Në seancën administrative më 10 dhjetor 2024, gjyqtarët e Kushtetueses kanë zgjedhur gjyqtarin Nexhmi Rexhepi, kryetar të ri të Gjykatës Kushtetuese, ndërsa gjyqtari Safet Hoxha është zgjedhur zëvendëskryetar.
Mandati i kryetarit të ri Nexhmi Rexhepi do të fillojë më 31 dhjetor 2024, pasi që Gresa Caka-Nimani të përfundojë mandatin e paraparë.
Gjykata Kushtetuese është autoriteti përfundimtar në Republikën e Kosovës për interpretimin e Kushtetutës dhe përputhshmërisë së ligjeve me Kushtetutën.
